Türkiye wekiller ömiki ürümchini ziyaret qildi

Türkiye jumhuriyitining xitayda turushluq bash elchisi oktay ependi bashlamchiliqidiki bir wekiller ömiki Uyghur diyarini ziyaret qildi.

Xitayning shinxu'a agéntliqining uchuridin qarighanda, türkiye wekiller ömiki 31- awghust küni kechte ürümchige yétip kélip, Uyghur aptonom rayon re'isi isma'il tiliwaldi qatarliq aptonom rayon rehberliri bilen körüshken.

Isma'il tiliwaldi söhbet jeryanida Uyghur élining ehwalini tonushturup, "shinjangning her xil tebi'iy bayliqliri mol, bularning hemmisining échish mumkinchiliki nahayiti zor ，qatnash qatarliq her qaysi asasiy qurulush eslihelirining dawamliq yaxshilinishigha egiship, shinjang bilen ichkiri hem etraptiki döletlerning alaqiliri kündin kün'ge qoyuqlashmaqta. Dölet ichi we sirtidiki chong kichik shirketler, chong shirketler guruhliri tushmu-tushtin shinjanggha kélip, échishqa qatnashmaqta, shinjang nahayiti jelip qilish küchige ige illiq zémin'ge aylandi." Dégen.

Xewerde körsitilishiche, türkiye bash elchisi oktay ependimu jawaben özining Uyghur éligha kélishidiki meqsitini chüshendürüp, türkiye bilen Uyghur élining til, medeniyet, turmush örip-adet qatarliq tereplerdin köpligen oxshashliqlargha ige ikenliki, shunga ikki terep téximu ilgiriligen halda hemkarliqni kücheytip, ortaq güllinishke bolidighanliqini bildürgen. Xewerge qarighanda, isma'il tiliwaldi Uyghur élidiki Uyghur, qazaq, qirghiz, özbék , tatar qatarliq türkiy tilliq xelqlerning türkiye türkliri bilen ortaqliqlargha ige ikenliki mesiliside héch qandaq inkas qayturmighan bolup, peqet türkiylik méhmanlarning ürümchi yermenkisige qatniship körüp béqishini teklip qilghan. (Ümidwar)