Һиндистан даирилири бир уйғур мусапирини қанунсиз тутқун қилди


2005.05.12
Share on WhatsApp
Share on WhatsApp

Җәнубий асия кишилик һоқуқ учур мәркизиниң пәйшәнбә күни елан қилған хәвиридин мәлум болушичә, һиндистан даирилири 9 - май күнидин башлап әмәт алим исимлик бир уйғур мусапирини қанунсиз тутуп турмақта.

Хәвәргә қариғанда, әмәт алим уйғур елидин чиққан бир сиясий паалийәтчи болуп, у бу йил 14 - феврал күни үч айлиқ виза билән һиндистанға кәлгән. У виза муддити тошуштин икки күн бурун йәни 9 - май күни, визисини узартишни тәләп қилип, һиндистандики чәтәлликләрни тизимға алдуруш ишханисиға барған.

Бирақ у шу пети тутқун қилинип, йеңи деһлидики лампур тутуп туруш мәркизигә қамалған. Һиндистан даирилири һечкимгә хәвәр қилмастин, уни қанунға хилап һалда 24 саәттин артуқ тутуп турғандин кийин, 10 - май күни чүштин кийин, бир достиға телефон қилип, өз әһвалини уқтурушиға рухсәт қилған.

Хәвәргә қариғанда, әмәт алим һазирғичә қоюп берилмигән болуп, мәзкур тәшкилат һиндистанниң хитай билән болған һәмкарлиқни көзләп, уни хитайға қайтурушидин қаттиқ әндишә қилмақта.

Хәвәрдин мәлум болушичә, әмәт алим һиндистанға кәлгән күниниң әтиси б д т мусапирлар комитетидин сиясий панаһлиқ тилигән. У илтимаси техи бир тәрәп қилиниш басқучида, һиндистан даирилири тәрипидин тутқун қилинған.

Һиндистан даирилириниң уни немә сәвәбтин тутқун қилғанлиқи техи мәлум әмәс. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.