Hindistan da'iriliri bir Uyghur musapirini qanunsiz tutqun qildi

Jenubiy asiya kishilik hoquq uchur merkizining peyshenbe küni élan qilghan xewiridin melum bolushiche, hindistan da'iriliri 9 - may künidin bashlap emet alim isimlik bir Uyghur musapirini qanunsiz tutup turmaqta.

Xewerge qarighanda, emet alim Uyghur élidin chiqqan bir siyasiy pa'aliyetchi bolup, u bu yil 14 - féwral küni üch ayliq wiza bilen hindistan'gha kelgen. U wiza mudditi toshushtin ikki kün burun yeni 9 - may küni, wizisini uzartishni telep qilip, hindistandiki chet'elliklerni tizimgha aldurush ishxanisigha barghan.

Biraq u shu péti tutqun qilinip, yéngi déhlidiki lampur tutup turush merkizige qamalghan. Hindistan da'iriliri héchkimge xewer qilmastin, uni qanun'gha xilap halda 24 sa'ettin artuq tutup turghandin kiyin, 10 - may küni chüshtin kiyin, bir dostigha téléfon qilip, öz ehwalini uqturushigha ruxset qilghan.

Xewerge qarighanda, emet alim hazirghiche qoyup bérilmigen bolup, mezkur teshkilat hindistanning xitay bilen bolghan hemkarliqni közlep, uni xitaygha qayturushidin qattiq endishe qilmaqta.

Xewerdin melum bolushiche, emet alim hindistan'gha kelgen künining etisi b d t musapirlar komitétidin siyasiy panahliq tiligen. U iltimasi téxi bir terep qilinish basquchida, hindistan da'iriliri teripidin tutqun qilin'ghan.

Hindistan da'irilirining uni néme sewebtin tutqun qilghanliqi téxi melum emes. (Arzu)