Xitay uchturpanda 10 neper Uyghurni bölgünchilik bilen eyiblep qolgha aldi
2005.08.24
Xitay saqchi da'iriliri Uyghur élining uchturpan nahiyiside 10 neper Uyghurni, musteqilliq we bölgünchilikni terghip qilghan hemde diniy teshwiqatlarni élip barghan dep eyiblep, qolgha aldi.
Gérmaniyidiki dunya Uyghur qurultiyining bayanatchisi dilshat rishitning bildürishiche, uchturpan nahiyilik jama'et xewpsizlik idarisi teripidin qolghan élin'ghan bu Uyghurlar uchturpanning aqyar yézisidin bolup, saqchilar bular heqqide uchurgha érishkendin kéyin, ularning öylirige ushtumtut basturup kirgen.
Netijide, aqyar yézisining 15 - kentidiki déhqan jümek exet, imamniyaz ghojek we abdul raxmanlarning öyidin, musteqilliq heriketliri teshwiq qilin'ghan ün'alghu léntisidin 30 i, shundaqla yene, 30 gha yéqin musteqilliq we islam dinigha a'it kitap bayqalghan. Xitay da'irilirining neziride bu xildiki lénta we kitaplarning hemmisi qanunsiz boyumlar dep qarilidu.
Aqsu wilayetlik saqchi idarisidiki ismini ashkarilashni xalimighan bir saqchi xadimi, fransiye axbarat agéntliqigha bu kishilerning qanunsiz teshkilatlargha qatnashqanliqini hemde ularning döletni parchlash jinayiti bilen eyiblen'genlikini bildürdi.
Xewerlerde yene, bu Uyghurlarning hetta bu yil öktebirde yeni Uyghur aptonom rayoni qurulghanliqining 50 yilliqi mezgilde, Uyghur élining musteqilliqini jakarlimaqchi bolghanliqi ilgiri sürülgen.
Dunya Uyghur qurultiyining bayanatchisi dilshat rishit, xitay hökümitining yéqindin buyan Uyghur élining her qaysi jaylirida mushundaq tutqun pa'aliyetlirini élip bériwatqanliqini eskertip, mezkur teshkilatning xitay hökümitidin, tinch yolda pa'aliyet élip barghan bu Uyghurlarni derhal qoyup bérishni telep qilidighanliqini tekitlidi. (Peride)
Munasiwetlik maqalilar
- Xitay saqchiliri ili wilayitide 179 tungganni tutup ketken
- Xitay hökümiti, aminixanni 37 oqughuchisi bilen qolgha alghanliqini étirap qildi
- Xitay hökümiti bir Uyghur ayalni qanunsiz diniy telim bergen dégen jinayet bilen qolgha aldi
- Xitay da'iriliri ürümchide jenupluq 6 Uyghur yashni tutqun qildi
- Yéza kadirini öltürüsh bilen eyiblen'gen ikki Uyghur étip tashlandi