Wang léchüen 19 chet'ellikni "térrorchiliq" bilen eyiblep tutqanliqini pash qildi


2005.10.18
Share on WhatsApp
Share on WhatsApp

Uyghur aptonum rayonluq partkomning sékritari wang léchü'en, xitayning bu yil Uyghur élide 19 chet'el puqrasini " térrorchiliq" bilen eyiblep qolgha alghanliqini bildürdi. U buni seyshenbe küni ürümchide ötküzülgen muxbirlarni kütüwélish yighinida éytqan.

Roytirs agéntliqi muxbirining ürümchidin xewer qilishiche, wang léchüen " biz bu yil chet'eldin shinjanggha buzghunchiliq qilish üchün ewetilgen 19 kishini qolgha alduq. Ular shinjang zéminigha kirip bolghiche, ularni derhal tuttuq" dep körsetken. Emma u tutulghanlarning dölet teweliki we millitini ashkarilimighan.

Roytris agéntliqining xewiride éytilishiche, xitay hökümiti sherqiy türkistan döliti qurushni xalaydighan musteqilchilerni "térrorchilar" dep eyiblep, ulargha qarshi tinimsiz heriket élip barmaqta.

Xewerge qarighanda, wang léchüen muxbirlarni kütüwélish yighinida yene, ataqliq Uyghur kishilik hoquq pa'aliyetchisi rabiye qadir xanimning ehwali we korlining sabiq sheher bashliqi mutellip yüsüpning ölümi mesilisi heqqide toxtalghan.

Wang léchü'en, rabiye qadir a'ilisining xitaydiki qerzini tügetmigiche, uning balilirining chet'elge chiqishigha ruxset qilinmaydighanliqini körsetti. Emma u rabiye qadir xanimning balilirining shexsiy erkinlikige héchqandaq dexliy- teruz yetküzmigenlikini éytti. Buning aldida amérika da'iriliri, rabiye qadir xanimning baliliri we dostlirining bixeterlikidin endishe qiliwatqanliqini bildürgen idi.

Wang léchüen shundaqla korlining sabiq sheher bashliqi mutellip yüsüpning yéqinda özini öltüriwalghanliqini tünji qétim étirap qildi. U, mutellip dilosining téxi yenimu ilgiriligen halda tekshürüliwatqanliqini, emma uning, ayalining parixorliqigha chétilghanliqi melum bolghandin kéyin, andin özini öltüriwalghanliqining éniqlan'ghanliqini körsetti.

Korlining sheher bashliqi mutellip yüsüp bu yil 9 - ayning axiri ölgen bolup, xitay metbu'atliri uning ölümi heqqide héchqandaq xewer bermigen idi. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.