Қарамайда бир уйғур зиялийси қолға елинди

Қарамайда чиқидиған "майбулақ " жорнилиниң сабиқ тәһрири абдурешит нияз бу йилниң башлири қарамай шәһәрлик дөләт бихәтәрлик идариси тәрипидин хитайға қарши җамаәт пикири пәйда қилди, дигән гунаһ билән қолға елинған. У, илгири қарамай маарип инистутида оқутқучи болған вә 1989 - йилдин кейин қарамайда чиқидиған " майбулақ" жорнилиға йөткилип, шу йәрдә тәһрирлик хизмити билән шуғулланған иди.

Исмини ашкарилашни халимайдиған хәвәр мәнбәлириниң әскәртишичә, у 2000 - йили язғучилар арисида пантүркизим идийисини тарқатти, дигән гуман билән хизмитидин бошутулған вә чәтәлгә оқушқа чиқмақчи болғанда паспорти тартивелинған. Вәқәдин хәвәрдар кишиләр абдуришит ниязниң бу йилниң башлири қолға елинғанлиқини вә һазирғичә сүрәксиз түрмидә тутуп турулуватқанлиқини билдүрмәктә.

Хитай һөкүмити 2000 - йили 1 - айниң 1 - күни мәрһум музикант нурмуһәммәт турсунниң сәнәт кечиликидин кейин, уйғур аптоном райони бойичә идеологийә саһәсидә "бөлгүнчиләр" гә қарши туруш һәрикитини қозғиған вә охшимиған көз қараштики язғучи вә сәнәтчиләр бастурулған иди. Нурмуһәммәт ясин " ява кәптәр"намлиқ һикайиси сәвәбидин 10 йиллиқ қамақ җазасиға һөкүм қилинди. Абдурешит нияз 1986 - йили или пидагогика иниститутини пүттүргән. Қарамай шәһәрлик җамаәт хәвпсизлик даирилири абдуришит нияз тоғрисида мәлумат беришни рәт қилди. (Әркин)