Xitay da'iriliri qolgha élin'ghan bir Uyghur mehbusni 3 kündin béri ach qoyghan


2006.06.06

Amérika Uyghur jem'iyitining ishenchlik menbelerdin igilishiche, xitay da'iriliri buningdin 2 ay ilgiri ili wilayitining süydöng nahiyiside qolgha alghan tudaxun hoshur isimlik bir Uyghur yashni qattiq qiyin qistaqqa alghan we bir qanche kündin béri ésip qoyup ach qoyghan. Bu yil 31 yashtiki tudaxun hoshur ili wilayitining süydöng nahiye bazirida olturushluq yekke tijaretchi idi.

Amérika Uyghur jem'iyitining düshenbe küni élan qilghan bayanatida eskertishiche, da'iriler uni süydöng nahiyisining qosh'ériq tutup turush merkizidiki " bir kamirgha ésip qoyghan we uni urghan" shundaqla ötken jüme kündin béri ach qoyghan. Tudaxun hoshur bu yil 22 - mart küni saqchilar teripidin atalmish " döletni parchilash süyqesti" bilen qolgha élin'ghandin béri süydöng nahiyisidiki qosh'ériq tutup turush merkizige solap qoyulghan idi. Amérika Uyghur jem'iyitining eskertishiche, turdaxun hoshur xitayche bilmigenliktin tutup turush merkizining 45 maddiliq qa'ide - tüzümini yadlap bérelmigen we shu sewebdin jazalan'ghan.

Biz süydöng saqchi idarisi we qosh'ériq tutup turush merkizige téléfon qilip tudaxunning ehwalini igilileshke tirishqan bolsaqmu, lékin téléfonni alidighan adem chiqmidi. Tudaxunning ehwalidin pewqul'adde endishe qiliwatqanliqini tekitligen Uyghur jem'iyiti bayanatchisi alim séytof, " biz bu uchurni jem'iyetke ashkarilash arqiliq bolmidi dégende ziyankeshlikning toxtitilishini ümid qilimiz" deydu. Ötken heptexitay da'iriliri Uyghur rehbiri rabiye qadirning 2 oghlini qolgha alghan we bir qizini a'iliside nezerbend qilghan idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.