Нурмәмәт һәсән исимлик бир уйғур яш бөлгүнчи җинайити билән қолға елинди

Дуня уйғур қурултийи ахбарат баянатчисиниң билдүрүшичә, уйғур елидики нурмәмәт һәсән исимлик бир яш, бөлгүнчи вә шәрқий түркистан тәшкилатиниң әзаси дигән җинайәтләр билән қолға елинип, қаттиқ қейин қистаққа учриған.

Мәзкүр вәқә, дуня уйғур қурултийиниң баянатчиси дилшат ришитқа бивастә ғулҗа шәһиридин инкас қилинған болуп, нурмәмәт һәсән, 12 ‏- декабир күни кәч саәт 9 дин 10 минут өткәндә үрүмчидин учуп ғулҗиға чүшкән айропилан арқилиқ 5 нәпәр қораллиқ сақчиниң қоршави астида, беши қара лата билән оралған һалда ғулҗа шәһиридики тутуп туруш орниға елип кетилгән.

Дилшат ришитниң ейтишичә, нурмәмәт һәсән әслидә 11 ‏- айниң 22 ‏- күни қизилсу областида тутулған, хитай сақчилири уни 11 ‏- айниң 11 ‏- күни ғулҗа шәһири җәнубий азадлиқ кочисидики " қериндашлар кулуби "да йүз бәргән партлаш вәқәси билән четишлиқ дәп гуман қилған вә уни қәшқәрдики шәрқий түркистан бөлгүнчилик тәшкилатиниң әзаси дәп гуман қилип қолға алған.

Ғулҗа шәһиридики вәқәдин толуқ хәвәрдар киши, дилшат ришитқа нөвәттә сақчиларниң нурмәмәт һәсәнни җинайитини иқрар қилдуруш үчүн қаттиқ қейин - қистаққа елип, вәһши қийнаш усуллири билән қийнаватқанлиқини билдүрүш билән биргә , қийнаш нәтиҗисидә нурмәмәт һәсәнниң мийип болуп қалғанлиқини инкас қилған.

Дилшат ришитниң игилишичә, хитай сақчи даирилири пат арида нурмәмәт һәсән үстидин сот һөкүми чиқиридикән. (Қанат)