Nurmemet hesen isimlik bir Uyghur yash bölgünchi jinayiti bilen qolgha élindi

• 
  2006-12-18

Dunya Uyghur qurultiyi axbarat bayanatchisining bildürüshiche, Uyghur élidiki nurmemet hesen isimlik bir yash, bölgünchi we sherqiy türkistan teshkilatining ezasi digen jinayetler bilen qolgha élinip, qattiq qéyin qistaqqa uchrighan.

Mezkür weqe, dunya Uyghur qurultiyining bayanatchisi dilshat rishitqa biwaste ghulja shehiridin inkas qilin'ghan bolup, nurmemet hesen, 12 ‏- dékabir küni kech sa'et 9 din 10 minut ötkende ürümchidin uchup ghuljigha chüshken ayropilan arqiliq 5 neper qoralliq saqchining qorshawi astida, béshi qara lata bilen oralghan halda ghulja shehiridiki tutup turush ornigha élip kétilgen.

Dilshat rishitning éytishiche, nurmemet hesen eslide 11 ‏- ayning 22 ‏- küni qizilsu oblastida tutulghan, xitay saqchiliri uni 11 ‏- ayning 11 ‏- küni ghulja shehiri jenubiy azadliq kochisidiki " qérindashlar kulubi "da yüz bergen partlash weqesi bilen chétishliq dep guman qilghan we uni qeshqerdiki sherqiy türkistan bölgünchilik teshkilatining ezasi dep guman qilip qolgha alghan.

Ghulja shehiridiki weqedin toluq xewerdar kishi, dilshat rishitqa nöwette saqchilarning nurmemet hesenni jinayitini iqrar qildurush üchün qattiq qéyin - qistaqqa élip, wehshi qiynash usulliri bilen qiynawatqanliqini bildürüsh bilen birge , qiynash netijiside nurmemet hesenning miyip bolup qalghanliqini inkas qilghan.

Dilshat rishitning igilishiche, xitay saqchi da'iriliri pat arida nurmemet hesen üstidin sot hökümi chiqiridiken. (Qanat)