Amérika Uyghur birleshmisi doklat bérish yighini chaqirdi

 Yéqindin buyan Uyghur diyarida yüz bergen bir qatar weqeler shuningdek xitay da'irilirining qarshiliq heriketlirini qattiq basturush mesililirini muzakire qilish hemde dunya Uyghur qurultiyi qatarliq teshkilatlarning pa'aliyetliridin doklat bérishni meqset qilghan mezkur yighinda aldi bilen amérika Uyghurliri birleshmisining bashliqliridin biri alim séyitof qisqiche doklat bérip, dunya Uyghur qurultiyi we amérika Uyghurliri birleshmisining jümlidin Uyghur milliy herikitining rehbiri rabiye qadir xanimning yéqindin buyan élip bériwatqan pa'aliyetlirini tonushturup ötti.

Alim séyitof sözide rabiye qadir xanimning eng muhim pa'aliyetlirining birining amérika prézidénti jorj bushning uni aq sarayda qobul qilishi, rabiye qadir xanimning prézidént bushqa Uyghurlarning nöwette duch kéliwatqan türlük qiyin mesililiri heqqide tonushturush bergenliki ikenlikini tekitlidi.

Yighinda dunya Uyghur qurultiyining re'isi rabiye qadir, dunya Uyghur qurultiyi, Uyghur kishilik hoquq layihisi, Uyghur xelq'ara démokratiye fondi jem'iyiti hemde amérika Uyghurliri birleshmisining yéqinqi waqitlardin buyan élip barghan pa'aliyetliridin doklat berdi.

Rabiye qadir xanim yétekchilikidiki dunya Uyghur qurultiyi mushu bir yildin buyan gherb memliketliride zor utuqlarni qolgha keltürgendin sirt yene shitabi amérikidiki Uyghur kishilik hoquq layihisi we démokratiye fondi jem'iyetliri Uyghurlarning kishilik hoquq, démokratiye hem ayallar mesilisini öz ichige alghan türlük mesililer boyiche doklatlarni teyyarlap, munasiwetlik organlargha sun'ghandin sirt yene ikki qétim xelq'ara Uyghur ayallirini insan hoquqi hem démokratiye bilimliri bilen terbiyilesh kurslirini uyushturup, körünerlik netijilerni qolgha keltürgen. Rabiye qadir xanim mezkur pa'aliyetlerning ehmiyiti we muweppeqiyetlirini mu'eyyenleshtürdi.

Rabiye qadir xanim sözide ene shundaq zor tirishchanliq bedilige hazir köpligen muxbirlar, xelq'araliq insan hoquqi teshkilatliri, munasiwetlik hökümet orunlirining Uyghurlarning ehwaligha qizip, ulardin éniq pakitlarni sorashni köpeytiwatqanliqini, qisqisi xelq'arada Uyghurlargha bolghan qiziqishlarning hazir zor derijide öskenlikini tekitlidi.

Washin'gtonda ötküzülgen bügünki söhbet we doklat bérish yighinigha qatnashqan ishtirakchilar nöwette Uyghurlar duch kéliwatqan mesililerni qandaq qilghanda xelq'ara jem'iyetke téximu ünümlük bildürüsh, Uyghur dewasini xelq'aralashturush qedimini téximu ilgiri sürüsh shuningdek yéqindin buyan Uyghur élining her qaysi jaylirida yüz bergen weqelerni öz ichige alghan köp türlük mesililer heqqide keng kushade muzakiriler élip bardi.