Америка - уйғур бирләшмиси: хитай қаттиқ бир бастуруш һәрикитигә тәйярланмақта
Мухбиримиз өмәр қанат хәвири
2008.08.23
2008.08.23
Ваң лечүән йеқинда дөләт кадирлириға қилған сөзидә, аталмиш үч хил күчләргә қарита елип бериливатқан күрәшни 'һаят - маматлиқ көрүши,' дәп көрсәткән иди.
Америка - уйғур бирләшмисиниң баянатида билдүрүлишичә, ваң лечүәнниң сөзлири, хитай даирилириниң уйғур сиясий өктичилирини бастуруш үчүн һазирғичә ишлитилип кәлгән қаттиқ зәрбә бериш һәрикитидинму еғир бир бастуруш һәрикитигә тәйярлиниватқанлиқини көрситидикән.
Чәтәллик диплуматлар вә мутәхәссисләрниңму хитай даирилириниң уйғур елидә қаттиқ бир бастуруш һәрикитигә тәйярлиниватқанлиқидин әндишә қиливатқанлиқи тәкитләнгән баянатта, бейҗиңдики бәзи чәтәллик дипломатларниң хитай һөкүмити, олимпик тәнһәрикәт йиғининиң ахирлишиши вә хәлқара җамаәтниң хитайниң кишилик һоқуқ хатирисигә болған диққитиниң азийиши билән һәрбий бир һәрикәт башлитиши мумкинлиқини баян қилишмақта" дейилгән.
Хитай даирилириниң қәшқәр вә кучада йүз бәргән вәқәләрдин кейин, пүтүн уйғур елидә кәң көләмлик бир тутқун һәрикити башлатқанлиқи әскәртилгән баянатта, бу қетимқи бастуруш һәрикитиниң уйғур ели билән чәклинип қалмай, хитайниң ичкири өлкилиридә яшаватқан уйғурларниму өз ичигә алғанлиқи, бейҗиң қатарлиқ хитайниң чоң шәһәрлиридә яшаватқан уйғурларниң мәзкур шәһәрләрдин чиқип кетишкә мәҗбурлиниватқанлиқи, тәкитләнгән.
Америка - уйғур бирләшмиси, хитай даирилириниң уйғурларға қарита елип баридиған һәрқандақ бастуруш һәрикитиниң районни техиму торақсизлаштурудиғанлиқи вә хитайниң өз миллий мәнпәәтигиму зиянлиқ икәнлики тәкитләнгән баянатида, хәлқара җамаәтни уйғур мәсилсигә көңүл бөлүшкә вә уйғурларға қарита елип берилидиған бастуруш һәрикәтлириниң алдини елишқа чақирған.