Amérika - Uyghur birleshmisi: xitay qattiq bir basturush herikitige teyyarlanmaqta

Amérika Uyghur birleshmisi jüme küni bayanat élan qilip, Uyghur aptonom rayonining partkom sékritari wang léchüenning atalmish üch xil küchlerge qarshi köresh toghrisida qilghan sözliri, Uyghur élide Uyghurlargha qarita yéngi bir qattiq bésim dewrining bashlinishning béshariti hésablinidu dep, körsetti.
Muxbirimiz ömer qanat xewiri
2008-08-23
Share

 Wang léchüen yéqinda dölet kadirlirigha qilghan sözide, atalmish üch xil küchlerge qarita élip bériliwatqan küreshni 'hayat - mamatliq körüshi,' dep körsetken idi.

Amérika - Uyghur birleshmisining bayanatida bildürülishiche, wang léchüenning sözliri, xitay da'irilirining Uyghur siyasiy öktichilirini basturush üchün hazirghiche ishlitilip kelgen qattiq zerbe bérish herikitidinmu éghir bir basturush herikitige teyyarliniwatqanliqini körsitidiken.

Chet'ellik diplumatlar we mutexessislerningmu xitay da'irilirining Uyghur élide qattiq bir basturush herikitige teyyarliniwatqanliqidin endishe qiliwatqanliqi tekitlen'gen bayanatta, béyjingdiki bezi chet'ellik diplomatlarning xitay hökümiti, olimpik tenheriket yighinining axirlishishi we xelq'ara jama'etning xitayning kishilik hoquq xatirisige bolghan diqqitining aziyishi bilen herbiy bir heriket bashlitishi mumkinliqini bayan qilishmaqta" déyilgen.

Xitay da'irilirining qeshqer we kuchada yüz bergen weqelerdin kéyin, pütün Uyghur élide keng kölemlik bir tutqun herikiti bashlatqanliqi eskertilgen bayanatta, bu qétimqi basturush herikitining Uyghur éli bilen cheklinip qalmay, xitayning ichkiri ölkiliride yashawatqan Uyghurlarnimu öz ichige alghanliqi, béyjing qatarliq xitayning chong sheherliride yashawatqan Uyghurlarning mezkur sheherlerdin chiqip kétishke mejburliniwatqanliqi, tekitlen'gen.

Amérika - Uyghur birleshmisi, xitay da'irilirining Uyghurlargha qarita élip baridighan herqandaq basturush herikitining rayonni téximu toraqsizlashturudighanliqi we xitayning öz milliy menpe'etigimu ziyanliq ikenliki tekitlen'gen bayanatida, xelq'ara jama'etni Uyghur mesilsige köngül bölüshke we Uyghurlargha qarita élip bérilidighan basturush heriketlirining aldini élishqa chaqirghan.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet