Үрүмчидә бу йил киргәндин буян 300 нәпәр адәм "3 хил күч" җинайити билән қолға елинған

23- Сентәбир үрүмчи шәһиридә "бихәтәр ишләпчиқириш йиғини" ечилип, үрүмчиниң аманлиқ вә муқимлиқини сақлаш әһвали тонуштурулған болуп, тәңритағ торида бу һәқтә берилгән хәвәрдин мәлум болушичә, бу йил киргәндин буян үрүмчи шәһәрлик җ х идариси "3 хил күч" вә "фалунгуң" муритлири болуп 300 гә йеқин адәмни қолға алған.

Хәвәрдә мундақ дейилгән: "бу йил киргәндин буян үрүмчи шәһәрлик җамаәт хәвпсизлик идариси 'үч хил күчләр' вә 'фалунгуң' қатарлиқ бидәт диний тәшкилатларниң һәрхил бөлгүнчилик вә бузғунчилиқ һәрикәтлиригә қаттиқ зәрбә берип, '3 хил күч' унсурлиридин 300 нәпәргә йеқинни қолға чүшүрди."

Униңдин башқа мәзкур хәвәрдә, үрүмчи җ х тармақлириниң йәнә йәр асти диний мәктәптин 35 ни, диний тәлим бәргән қаримдин 106 нәпәрни қолға чүшүргәнлики вә 167 нәпәр диний тәлим еливатқан өсмүрни "азат" қилғанлиқи ашкариланған.

Бир һәптә илгири америка һөкүмити елан қилған "хәлқара диний етиқад әркинлики доклати" ниң хитайға қаритилған қисмиға қарши, хитай ташқи ишлар министирлиқи наразилиқ билдүрүп, америкиниң бу доклатини "асассиз" дәп атиған вә хитай баянатчиси җяң йү, хитайда пуқраларниң "кәң диний етиқад әркинликидин бәһримән" болуп келиватқанлиқини оттуриға қойған иди.

Һалбуки, бу йил киргәндин буян үрүмчи шәһиридә дини тәлим бәргән нурғун қаримлар қолға елинған вә дини тәлим еливатқан өсмүрләрниң тарқитивитилгәнлики һәққидики мәлуматлар, хитай ташқи ишлар министирлиқиниң наразилиқ баянатиға қара көләңгә ташлап турмақта. (Җүмә)