Ürümchide bu yil kirgendin buyan 300 neper adem "3 xil küch" jinayiti bilen qolgha élin'ghan

23- Séntebir ürümchi shehiride "bixeter ishlepchiqirish yighini" échilip, ürümchining amanliq we muqimliqini saqlash ehwali tonushturulghan bolup, tengritagh torida bu heqte bérilgen xewerdin melum bolushiche, bu yil kirgendin buyan ürümchi sheherlik j x idarisi "3 xil küch" we "falun'gung" muritliri bolup 300 ge yéqin ademni qolgha alghan.

Xewerde mundaq déyilgen: "bu yil kirgendin buyan ürümchi sheherlik jama'et xewpsizlik idarisi 'üch xil küchler' we 'falun'gung' qatarliq bid'et diniy teshkilatlarning herxil bölgünchilik we buzghunchiliq heriketlirige qattiq zerbe bérip, '3 xil küch' unsurliridin 300 neperge yéqinni qolgha chüshürdi."

Uningdin bashqa mezkur xewerde, ürümchi j x tarmaqlirining yene yer asti diniy mekteptin 35 ni, diniy telim bergen qarimdin 106 neperni qolgha chüshürgenliki we 167 neper diniy telim éliwatqan ösmürni "azat" qilghanliqi ashkarilan'ghan.

Bir hepte ilgiri amérika hökümiti élan qilghan "xelq'ara diniy étiqad erkinliki doklati" ning xitaygha qaritilghan qismigha qarshi, xitay tashqi ishlar ministirliqi naraziliq bildürüp, amérikining bu doklatini "asassiz" dep atighan we xitay bayanatchisi jyang yü, xitayda puqralarning "keng diniy étiqad erkinlikidin behrimen" bolup kéliwatqanliqini otturigha qoyghan idi.

Halbuki, bu yil kirgendin buyan ürümchi shehiride dini telim bergen nurghun qarimlar qolgha élin'ghan we dini telim éliwatqan ösmürlerning tarqitiwitilgenliki heqqidiki melumatlar, xitay tashqi ishlar ministirliqining naraziliq bayanatigha qara kölengge tashlap turmaqta. (Jüme)