Shangxey hemkarliq teshkilati "üch xil küch" ke qarshi hemkarliqni yenimu kücheytmekchi

Shangxey hemkarliq teshkilati peyshenbe küni " térrorchiliq, bölgünchilik we diniy radikalliq" qa qarshi hemkarliqni yenimu kücheytidighanliqini bildürdi.

Shangxey hemkarliq teshkilatining bash sékritari jang dégu'ang peyshenbe küni moskwadiki muxbirlarni kütüwélish yighinida "biz üch xil küchning pa'aliyetlirige zerbe bérishte zor miqdarda xizmet ishliduq, emeliy ünümlernimu qolgha keltürduq. Bundin kéyin, her qaysi eza döletler bu tereptiki hemkarliqni téximu kücheytidu" dédi. U shangxey hemkarliq teshkilatigha eza döletlerning bash ministirlirining yighinigha qatnishish üchün moskwagha kelgen. En'giliye b b s radi'o - téléwiziye istansisining xewirige qarighanda, mezkur teshkilatning yitekchiliri bolghan xitay we rusiye, özbékistan we qirghizistanda yéqinqi bir nechche ay ichide yüz bergen öktichi pa'aliyetlerdin endishe qilmaqta. Xitay Uyghur musteqilchilirini, rusiye bolsa chéchenlerni " térrorchi" dep atap, ularni basturushqa urunmaqta.

Jang dégu'ang yene shangxey hemkarliq teshkilatining gherbke qarshi küch oyushturghanliqini inkar qilip, mezkur teshkilatining bir herbiy ittipaqqa aylinish niyiti yoqliqini tekitlidi. Biraq u amérikining özbékistandin qoshun chékindürüshning éniq waqtini bikitishini ümüd qilidighanliqini bildürdi. Nurghun analizchilar, shangxey hemkarliq teshkilatining barghansiri amérikining ottura asiyadiki tesir küchini siqip chiqirishqa heriket qiliwatqanliqini bildürmekte. Shangxey hemkarliq teshkilati bu yil 7 - ayda, amérikini ottura asiyadiki baziliridin qoshun chikindürüshni telep qilghan idi. (Arzu)