Уйғур елидә "үч хил күчләр" ниң мәктәпләргә сиңип киришигә зәрбә бериш һәрикити башланди


2006.03.29

Уйғур аптоном районлуқ җамаәт хәвпсизлик идарисиниң мәлум қилишичә, аптоном районлуқ җ х идариси, маарип вә мәдәнийәт органлири билән бирликтә бу йил 5‏-айдин 12‏- айғичә уйғур елидики мәктәп орунлирида "үч хил күчләр" сиңип киришигә зәрбә бериш һәрикитини елип баридикән.

Җ х идариси мәхсус түр бойичә елип баридиған бу алаһидә һәрикитини тонуштуруп, йеқинқи йиллардин буян "үч хил күчләр" ниң яш-өсмүрләрниң идийисиниң садда болуши, җәмийәт тәҗрибисиниң кәмчил болуши шундақла ақ-қарини пәрқ етиш иқтидариниң йетәрлик болмаслиқидин пайдилинип, уларға бөлгүнчи идийиләрни сиңдүрүп, мәктәп орунлириниң бихәтәрликигә еғир зиян йәткүзгәнликини билдүрди.

Уйғур ели хәвәр торида көрситилишичә, бу һәрикәт аптоном районниң 2006‏- йилдики нуқтилиқ тәртипкә селиш муһим хизмәтлириниң бири һесаблинидикән. Шундақла бу һәрикәт елип берилидиған 7 ай ичидә җамаәт хәвпсизлик идариси һәтта һәр қайси мәктәпләргә ярдәмлишип мәктәп қоғдаш әтрәтлирини қуруп беридикән.

Хитай һөкүмити болупму йеқинқи бир нәччә йиллардин буян уйғур елидә 3 хил күчләргә зәрбә беришни алаһидә тәкитләп келиватқан болуп, уйғур аптоном район рәиси исмайил тиливалдиму көп қетим бу хизмәтниң уйғур елидики алдинқи муһим вәзипә икәнликини әскәрткән иди. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.