Uyghur élide "üch xil küchler" ning mekteplerge singip kirishige zerbe bérish herikiti bashlandi

Uyghur aptonom rayonluq jama'et xewpsizlik idarisining melum qilishiche, aptonom rayonluq j x idarisi, ma'arip we medeniyet organliri bilen birlikte bu yil 5‏-aydin 12‏- ayghiche Uyghur élidiki mektep orunlirida "üch xil küchler" singip kirishige zerbe bérish herikitini élip baridiken.

J x idarisi mexsus tür boyiche élip baridighan bu alahide herikitini tonushturup, yéqinqi yillardin buyan "üch xil küchler" ning yash-ösmürlerning idiyisining sadda bolushi, jem'iyet tejribisining kemchil bolushi shundaqla aq-qarini perq étish iqtidarining yéterlik bolmasliqidin paydilinip, ulargha bölgünchi idiyilerni singdürüp, mektep orunlirining bixeterlikige éghir ziyan yetküzgenlikini bildürdi.

Uyghur éli xewer torida körsitilishiche, bu heriket aptonom rayonning 2006‏- yildiki nuqtiliq tertipke sélish muhim xizmetlirining biri hésablinidiken. Shundaqla bu heriket élip bérilidighan 7 ay ichide jama'et xewpsizlik idarisi hetta her qaysi mekteplerge yardemliship mektep qoghdash etretlirini qurup béridiken.

Xitay hökümiti bolupmu yéqinqi bir nechche yillardin buyan Uyghur élide 3 xil küchlerge zerbe bérishni alahide tekitlep kéliwatqan bolup, Uyghur aptonom rayon re'isi ismayil tiliwaldimu köp qétim bu xizmetning Uyghur élidiki aldinqi muhim wezipe ikenlikini eskertken idi. (Peride)