ئۇلۇغچات ناھىيىسىدە بىر كۆمۈر كان قۇدۇقىدا پارتلاش يۈز بەردى


2007-12-16
Share

16- دېكابىر كۈنى قىزىل سۇ قىرغىز ئاپتونوم ئوبلاستىغا تەۋە ئۇلۇغچات ناھىيىسىدىكى بىر كۆمۈر كان قۇدۇقى پارتلاپ كېتىپ، تۆت ئىشچى ئۆلگەن، ئىككى نەپىرى يارىلانغان.

شىنخۇا خەۋەر تورىنىڭ بۇ ھەقتە تارقاتقان ئۇچۇرىدىن قارىغاندا، مەزكۇر كۆمۈر كان ۋەقەسى ئۇلۇغچات ناھىيىسى، ئۇلۇغچات يېزىسى تەۋەلىكىدە يەنى ناھىيە مەركىزىدىن 123 كىلومېتىر نېرىدا يۈز بەرگەن بولۇپ، ئەينى ۋاقىتتا كان ئاستىدا ئۈچ نەپەر ئىشچى ئىشلەۋاتقان ئىكەن.

ھازىر، قىزىل سۇ دائىرىلىرى ۋەقەنىڭ سەۋەبلىرىنى تەكشۈرۈش ۋە ئۆلگۈچىلەرنىڭ ئاخىرەتلىك ئىشلىرىنى بىر تەرەپ قىلىش خىزمەتلىرىنى جىددىي ئېلىپ بارماقتا ئىكەن. بىراق، ئۇلۇغچات قىرغىز ۋە ئۇيغۇرلارنى ئاساس قىلغان ناھىيە بولسىمۇ، ئەمما، خىتاي ئاخبارات ۋاسىتىلىرى قازاغا ئۇچرىغۇچىلارنىڭ مىللىي كىملىكى شۇنىڭدەك مەزكۇر كاننىڭ ھۆكۈمەت بىلەن بولغان مۇناسىۋىتى ھەمدە قازاغا ئۇچرىغۇچىلارغا تۆلەم تۆلەش مەسىلىسى قاتارلىقلار ھەققىدە ھېچ نېمە يازمىغان.

خەۋەرلەردىن قارىغاندا، ھازىر ئۇيغۇر ئېلىنىڭ كۆپلىگەن كۆمۈر كانلىرى ئىچكىرىدىن چىققان خىتاي خوجايىنلىرىنىڭ قولىغا ئۆتكەن. ئۇنىڭدىن باشقا يەنە خىتاي پۇلدار خوجايىنلار ئۇيغۇر ئېلىدىكى كۆمۈر زاپىسى مول جايلاردا خالىغانچە كان ئاچماقتا. ئۇلار پۇل تېپىشنىلا كۆزلەپ، كان ئىشچىلىرىنىڭ بىخەتەرلىكىگە كۆڭۈل بۆلمىگەن، نەتىجىدە نۇرغۇنلىغان بىخەتەرلىك ئۆلچىمىگە توشمىغان چوڭ كىچىك كانلار پەيدا بولغان ۋە ھادىسىلەر داۋاملىق يۈز بېرىپ تۇرغان. ( ئۈمىدۋار)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت