Ürümchide xelq'araliq kompyutér uchur téxnikisi boyiche terbiyilesh kursi échildi

Rusiyining sibiriye rayoni we ottura asiyadiki qazaqistan, qirghizistan, tajikistan qatarliq döletlerdin kelgen 27 neper uchur téxnikisi mutexessisliri ürümchige jem bolup, shinjang ottura asiya pen-téxnika we iqtisad uchur merkizi achqan terbiyilesh kursigha qatnashqan.

Shinxu'a agéntliqining xewer qilishiche, bu, ürümchide échilghan tunji qétimliq kompyutér uchur téxnikisigha munasiwetlik xelq'ara xaraktérliq terbiyilesh pa'aliyiti bolup hésablinidiken.

Mezkur terbiyilesh kursigha kelgenler asasliqi hökümet uchur téxnika xadimliri, uchur téxnikisi sahesidiki mutexessisler we karxanichilar bolup, kurs 28-maydin 11-iyun'ghiche dawamlishidiken. Kurs jeryanida qatnashquchilargha ürümchi iqtisadiy tereqqiyat rayonidiki we ürümchidiki bezi muhim karxanilarni ziyaret qildurushmu kün tertipke kirgüzülgen.

Mezkur terbiyilesh kursini uyushturghan erbablar bu kursning xitayning rusiye we ottura asiya döletliri bilen bolghan kompyutér uchur we tor téxnikisi sahesidiki hemkarliqlirini ashurush jümlidin xitayning kompyutér téxnika mehsulatlirini rusiye we ottura asiya bazarlirida bazar tapquzushni meqset qilghan .

Xitay hökümiti yéqindin buyan gherbni échish istratégiyisige bina'en ürümchini xitay boyiche chong sheherlerning birige aylandurush arqiliq, uni xitayning gherbiy asiya we ottura asiyagha körsitidighan siyasiy, iqtisadiy hem bashqa tesirliridiki baza qilishni meqset qiliwatqanliqi , shu sewebtin ürümchide bezi xelq'araliq pa'aliyetlerni orunlashturushni kücheytiwatqanliqi melum.(Ümidwar) .