Ürümchi xelq'ara ayrodromida wiza bérish tüzümi yolgha qoyuldi

Xitay dölet ishliri kabinéti 10-iyundin étibaren ürümchi xelq'ara ayrodromining kirish ötkilide chet'elliklerge wiza béjirip bérish tüzümi yolgha qoydi.

Shinxu'a agéntliqining uchurigha asaslan'ghanda, 10-iyundin étibaren dunyaning her qaysi jayliridin Uyghur éligha sayahet, xizmet, pen-téxnika we medeniyet almashturush ishliri bilen kélidighan chet'el puqraliri biwasite ürümchi ayrodromining chégra ötkilide teklipname qatarliq kéreklik höjjetlerni körsitip, xitaygha kirish shertlirige chüshse wiza élip, xitay térritoriyiside pa'aliyet qilish salahiyitige érisheleydiken hemde xitay hökümiti chetke achqan xalighan bir éghiz arqiliq chégridin chiqsa bolidiken.

10-Iyun küni ürümchi xelq'ara ayrodromida mexsus wiza béjirish ishxanisi qurulghan bolup, emma mezkur ishxana peqet birla qétim kirish wizisi béjirish salahiyitige ige iken.

Xitay axbarat wasitiliri ürümchi ayrodromida yolgha qoyulghan bu belgilimining peqet özliri turushluq döletlerdiki xitay konsulxanilarda wiza élishqa waqti yetmigen, jiddiy seperge atlan'ghan chet'el puqralirigha asanliq yaritip bérish üchün ikenlikini chüshendürgen.

Ürümchi xelq'ara ayrodromi xitayning chetke achqan besh chong ayrodromining birige aylan'ghan bolup, chet'elliklerning bu ayrodrom arqiliq xitaygha kirishi ötken yili 130 ming adem qétimgha yetken iken.

Nöwette, ürümchi ayrodromidin bishkek, almuta, islam abad, moskwa, yéngi sibiriye qatarliq sheherlerge biwasite ayropilan qatnishishi yolgha qoyulghan. (Ümidwar)