Ürümchide oqughuchilarning ottura ‏- bashlan'ghuch mekteplerge kirishi qiyin bolmaqta

Séntebir kirishi bilen ürümchidiki 300din artuq ottura hemde bashlan'ghuch mektepler oqush bashlash murasimi ötküzüp ,3 - séntebirdin bashlap yéngi mewsumlük dersni resmiy bashlidi.

Ürümchi sheherlik ma'arip idarisi bashliqi li jyenshingning shinxu'a agéntliqi muxbirigha ashkarilishiche, bu yil yéngi oqush mewsümide ürümchidiki barliq ottura hem bashlan'ghuch mekteplerde oqughuchi sani pewqul'adde éship kétish ehwali körün'gen bolup , mektepler asasen toyunma halette iken shundaqla oqughuchi éship kétish ehwali éghirlashqan yéqinqi üch yildin buyan, , sinip yétishmeslik, parta yétishmeslik ,oqutquchi yétishmesliktek ehwal jiddiy bolmaqta iken.

Li jyenshingning bildürüshiche , bolupmu ottura mekteplerde ötken yildikige qarighanda nechche onming oqughuchi köpeygen. Mektepler bu oqughuchilarni siniplarni kéngeytish arqiliq qobul qilishqa mejbur bolghan. Bezi siniplarda oqughuchilar sani 60tin éship ketken. Hetta ders bashlan'ghan bolsimu , bashlan'ghuch mekteplerning bezi siniplirida oqughuchilar öre turup ders anglashqa mejbur bolghan.

Ürümchi sheherlik ma'arip idarisining éniqlishiche, ürümchide esli olturushluq yerlik nopusning oqush yéshidiki perzentlirining sani unche köp emes bolup , yéqinqi yillardin buyan ürümchide aqma nopusning shiddet bilen örlishi netijiside, mekteplerde oqughuchilar yildin ‏- yilgha éship barmaqta.

Bolupmu xitay hökümiti 2004 - yili 9 - aydin bashlap sheherlerge kirgen déhqan ishchilarning perzentlirining oqush heqqini bikar qilish siyasitini yürgüzüshke bashlighandin kéyin, ürümchidiki mekteplerde xitay aqqun ishchilarning perzentliri hessilep köpiyip mekteplerde yuqiriqidek oqughuchi éship kétish ehwali éghirlashmaqta iken. (Gülchéhre)