Ürümchi nopusi ikki milyon ikki yüz mingdin ashti

Ürümchi pilanliq tughut komitétining ashkarilishigha qarighanda, ürümchi nopus ehwali heqqide séntebirning axiri chiqirilghan statistikiliq sanliq melumatlardin melum bolushiche, ürümchi nopusi ikki milyon 261 ming 185 ke yetken.

Statistikida milletler ayrimisi buyiche nopus statistikisi toluq bérilmigen bolsimu emma, ürümchi omumiy nopusining %71.94Ini xitay nopusi igileydighanliqi, bashqa az sanliq milletler omumiy nopusining %28.6 Ke yétidighanliqi heqqide melumat bérilgen. Uyghur aptonom rayonidiki asasiy yerlik millet hésablan'ghan Uyghurlarning ürümchi shehiride qanchilik nisbetni igileydighanliqi körsitilmigen.

Ilgiriki melumatlarda xatirilinishiche 1949 ‏- yili pütün Uyghur élidiki xitay küchmenlirining nopusi 300 ming etrapida bolghan. Bezi közetchiler nöwette, ürümchi shehiridiki yerlik hem köchmen emeliy nopusning töt milyon'gha baridighanliqini otturigha qoymaqta shundaqla xitay küchmenlirining igileydighan nisbiti da'iriler melum qilghandinmu artuq bolushi mumkin iken.

Buning aldida ürümchi hökümet da'iriliri yéqinqi on yildin buyan ürümchidiki köchmenler nopusining shiddet bilen éshishigha egiship, bir qatar mesililerning meydan'gha chiqiwatqanliqini ilgiri sürgen idi. Yeni buningda qatnash tosalghusi barghanche éghirlashqan, oqush yéshidiki balilargha mektep yétishmeslik körülgen. Körsitilishiche, sheherning kéreksiz su hem exletlerni bir terep qilish séstimisigha alahide bésim élip kelgenlikidek mesililer bir qeder körünerlik mesililer iken.

Dunya Uyghur qurultéyi qatarliq Uyghur teshkilatliri "xitay hökümitining Uyghur élidiki yerlik milletlerge pilanliq tughut siyasitini qattiq qolluq bilen yürgüzüsh arqiliq ularning köpiyishini kontrol qilish bilen bir peytte, xitay köchmenlirini Uyghur élige shiddet bilen yötkep, köchmen xitaylarni barghanche Uyghur élidiki asasliq milletke aylandurushtek siyasiy gherizini emelge ashurush üchün jiddiy heriket qilmaqta "dep naraziliq bildürmekte. (Gülchéhre)