Ürümchi sheher sirtidiki yuqiri sür'etlik tash yolda üch adem jénidin ayrildi

Tengritagh tor bétining seyshenbe künidiki xewiridin melum bolushiche, 25 - iyun, düshenbe, kech sa'et 21 din 40 minut ötkende ürümchi sirtidiki yuqiri sür'etlik tash yolning jujyawen qismida jenubtin shimalgha qarap mangghan alte mashina egeshme weqege uchrap, besh mashinigha ot ketken. Bu éghir qatnash weqeside hazirghiche melum bolushiche, üch adem ölgen. Töt adem éghir yarilan'ghan.

Mezkür qatnash weqesi yüz bergendin kéyin xéli mezgilgiche qatnash üzülgen. Ot öchürüsh, qutquzush, hemde qatnash weqesini bir terep qilish xadimliri hazirgha qeder mezkur qatnash weqesi meydanini bir terep qilish bilen meshghul bolmaqta iken.

Mezkür qatnash paji'esining kélip chiqish sewebi heqqide da'iriler téxi melumat élan qilmidi.

Yéqinqi yillardin buyan, gerche Uyghur élining qatnash wastiliri shundaqla yuqiri sür'etlik tash yolliri tereqqiy qilip köpeygen bolsimu, mushuninggha oxshash ejellik qatnash weqeliri köplep yüz bermekte. Ilgiriki oxshap kétidighan qatnash weqelirining asasen kéchide yol yürgen shopurlarning uxlap qélishi seweblik kélip chiqqanliqi éniqlan'ghan idi. Shundaqla shopurluq kinishkisige qanunsiz yollar bilen ige bolghan na'usta, tejribisiz kishilerning weqe sadir qilishi bir qeder yuqiri nisbetni igilimekte. (Gülchéhre)