" Ürümchi yermenkisi" ning axbarat élan qilish yighini muddettin burun ötküzüldi

Xitay hökümiti, 16 ‏- nöwetlik " ürümchi " yermenkisining axbarat élan qilish yighinini béyjingda muddettin burun ötküzdi.

Xitay xewer wastilirining bügün bu heqte bergen xewerliridin melum bolushiche, ürümchi yermenkisining axbarat élan qilish yighinida Uyghur élidiki kattibashliridin xu wéy, xitayning ichi we sirtidikilerning ürümchi yermenkisige qatnishishini we meblegh salghuchilarning pursetni ching tutup, mezkür yermenkidin behir élishini tewsiye qilghan.

Ürümchi yermenkisi ötküzülgendin buyan, tashqi soda pütüshüsh sommisi 19 milyard 610 milyon amérika dollirigha, tashqi iqtisad hemkarliq pütüshüsh sommisi 6 milyard 600 milyon amérika dollirigha, ichki iqtisad - soda pütüshüm omumiy sommisi 410 milyard 690 milyon yüen'ge yetken. Her nöwetlik ürümchi yermenkisige qatnishidighan sodigerlerning sani 30 mingdin éship, 900 din artuq karxana yermenkige qatnashqan.

Emma 16 qétim ötküzülgen " ürümchi " yermenkisining Uyghur xelqi üchün héchqandaq iqtisadiy menpe'et élip kelmigenlikini bildürgen, amérika Uyghur birleshmisining bash katipi alim séyitof ependi: " Uyghur élida élip bérilghan herqandaq soda hemkarliq netijiliri we bu zimindiki munbet yer bayliqliridin Uyghurlar behirlen'gen emes, eger xitay da'iriliri Uyghurlarning turmushigha köngül bölgen bolsa, bügün Uyghurlar xitaydiki eng namrat kishiler hésablanmaytti" deydu.

Uyghur siyasiy pa'aliyetchiliri yene " ürümchi yermenkisi" axbarat élan qilish yighinining muddettin burun échilishi": chet'ellik sodigerlerni bu rayon'gha jelp qilish üchün, yéterlik waqit hazirlash meqsdini ishqa ashurush" tin ibaret diyishmekte .

Chet'el axbarat wastiliridin yaponiye radi'o jem'iyiti, en'giliye rétir agéntliqi , fransiye axbarat agéntliqi we xitay axbarat orunliri bolup50 tin artuq axbarat idarisi hemde rusiye, qazaqistan , pakistan, mongghuliye qatarliq döletlerning béyjingda turushluq elchixaniliri , soda wekilliri hemde shangxey hemkarliq teshkilati katibat bashqarmisining wekilliri bu qétim ötküzülgen axbarat élan qilish yighinigha qatnashqan. (Eqide)