Үрүмчи хәлқара сода йәрмәнкиси ечилди

 Бу нөвәтлик үрүмчи йәрмәнкиси, йәрлик иқтисади сода йәрмәнкисидин дөләт дәриҗилик иқтисади сода йәрмәнкиси дәриҗисигә өстүрүлгәндин кейинки тунҗи қетимлиқ йәрмәнкә һесаблинидиған болғачқа, хитай сода министирлиқи, хитай хәлқара содини илгири сүрүш җәмийити вә уйғур аптоном районлуқ хәлқ һөкүмити баш болуп өткүзгән.

Йәрмәнкиниң ечилиш мурасимиға хитайниң һәр қайси өлкә һәм хоңкоң алаһидә мәмурий район рәһбәрлири һәм сода өмәклиридин башқа, уйғур елигә чегридаш болған сәккиз дөләт әлчихана вәкиллирини һәм сода өмәклирини әвәткәндин башқа, йәрмәнкиниң башлиниш мурасимиға йәнә шаңхәй һәмкарлиқ тәшкилати баш катипи полат нурғалийоф, түркийә дөләт ишлири министири куршат түзмән вә йәнә америка, корийә, һиндонезийә, моңғулийә қатарлиқ дөләтләрниң алақидар министир әрбаплириму иштирак қилған.

Йәрмәнкигә 25 дөләт һәм район, хитай ичидин йигирмә нәччә өлкә шәһәрләрдин кәлгән сода өмәклири вә меһманлар болуп оттуз миңдин көпрәк адәм қатнашқан. Шундақла үрүмчи хәлқара сода йәрмәнкисиниң ечилиш мурасимиға қатнашқан хәлқаралиқ тәшкилат һәм дөләт вәкиллири - 2008 йиллиқ мәркизи, ғәрбий җәнуби асия райони иқтисади һәмкарлиқ муһакимисигә қатнашқан.

Үрүмчидин берилгән хәвәрләргә қариғанда, бу йиллиқ йәрмәнкигә қатнашқан сода өмәклири һәм содигәрләр илгирики йиллардикигә қариғанда алаһидә көп болуп,бултурқиға қариғанда зал ичи яйма орнидин 249 и, зал сиртида йәнә 40 яйма орни көпәйтилгән. Бу қетимлиқ йәрмәнкиму сода алақә вә мәбләғ селишни асас қилған.

Гәрчә үрүмчи хәлқара сода йәрмәнкиси 17 йилдин буян охшаш вақит, охшаш орунда йилдин ‏ - йилға кеңийип давам қиливатқан болсиму, йәрлик уйғур кархана һәм содигәрлиригә интайин чәклик һалда орун берилмәктә. Бу қетимлиқ йәрмәнкидә уйғур содигәрлириниң қанчилик нисбәтни игиләйдиғанлиқи намәлум.

Уйғур елидә чатма вәқәләр йүз бәргән, хитай һөкүмити районда қаттиқ бастурушни давамлиқ қиливатқан бир пәйттә ечилған бу хәлқара сода йәрмәнкиси, дуня мәтбуатиниңму нәзиригә елинди. Хәвәрләрдә үрүмчи йәрмәнкисиниң уйғур елиниң иқтисади мәнпәәтинила нишан қилған әмәс, бәлки хитайниң сода алақә һәм мәбләғ селиш сәһниси болуватқанлиқи қәйт қилинмақта.