Ürümchi xelq'ara soda yermenkisi échildi
Muxbirimiz gülchéhre xewiri
2008.09.02
2008.09.02
Bu nöwetlik ürümchi yermenkisi, yerlik iqtisadi soda yermenkisidin dölet derijilik iqtisadi soda yermenkisi derijisige östürülgendin kéyinki tunji qétimliq yermenke hésablinidighan bolghachqa, xitay soda ministirliqi, xitay xelq'ara sodini ilgiri sürüsh jem'iyiti we Uyghur aptonom rayonluq xelq hökümiti bash bolup ötküzgen.
Yermenkining échilish murasimigha xitayning her qaysi ölke hem xongkong alahide memuriy rayon rehberliri hem soda ömekliridin bashqa, Uyghur élige chégridash bolghan sekkiz dölet elchixana wekillirini hem soda ömeklirini ewetkendin bashqa, yermenkining bashlinish murasimigha yene shangxey hemkarliq teshkilati bash katipi polat nurghaliyof, türkiye dölet ishliri ministiri kurshat tüzmen we yene amérika, koriye, hindonéziye, mongghuliye qatarliq döletlerning alaqidar ministir erbaplirimu ishtirak qilghan.
Yermenkige 25 dölet hem rayon, xitay ichidin yigirme nechche ölke sheherlerdin kelgen soda ömekliri we méhmanlar bolup ottuz mingdin köprek adem qatnashqan. Shundaqla ürümchi xelq'ara soda yermenkisining échilish murasimigha qatnashqan xelq'araliq teshkilat hem dölet wekilliri - 2008 yilliq merkizi, gherbiy jenubi asiya rayoni iqtisadi hemkarliq muhakimisige qatnashqan.
Ürümchidin bérilgen xewerlerge qarighanda, bu yilliq yermenkige qatnashqan soda ömekliri hem sodigerler ilgiriki yillardikige qarighanda alahide köp bolup,bulturqigha qarighanda zal ichi yayma ornidin 249 i, zal sirtida yene 40 yayma orni köpeytilgen. Bu qétimliq yermenkimu soda alaqe we meblegh sélishni asas qilghan.
Gerche ürümchi xelq'ara soda yermenkisi 17 yildin buyan oxshash waqit, oxshash orunda yildin - yilgha kéngiyip dawam qiliwatqan bolsimu, yerlik Uyghur karxana hem sodigerlirige intayin cheklik halda orun bérilmekte. Bu qétimliq yermenkide Uyghur sodigerlirining qanchilik nisbetni igileydighanliqi namelum.
Uyghur élide chatma weqeler yüz bergen, xitay hökümiti rayonda qattiq basturushni dawamliq qiliwatqan bir peytte échilghan bu xelq'ara soda yermenkisi, dunya metbu'atiningmu nezirige élindi. Xewerlerde ürümchi yermenkisining Uyghur élining iqtisadi menpe'etinila nishan qilghan emes, belki xitayning soda alaqe hem meblegh sélish sehnisi boluwatqanliqi qeyt qilinmaqta.