ئۇيغۇر ئاپتونوم رايونىنىڭ "قانۇن گېزىتى" ئۆتكەن ئايدىكى بىر سانىدا ئوبزورچى ماقالىسى ئېلان قىلىپ، پرېزىدېنت بۇشنىڭ ئۇيغۇر رەھبىرى رابىيە قادىر خانىم بىلەن پراگادا كۆرۈشكەنلىكى ۋە ئۇنى ماختىغانلىقىنى ئىبارىسى ئېغىر سۆزلەر بىلەن ئەيىبلىگەن. ماقالىدە " ئامېرىكا پرېزىدېنتى بۇش ئۆزى ئېتىراپ قىلغان تېررورلۇق تەشكىلاتنىڭ كاتتىبېشىنى يەنە بىر قېتىم كۆككە كۆتەردى" دەيدۇ.
لېكىن بۇش ھۆكۈمىتى رابىيە قادىر خانىم قۇرغان ۋە يىتەكچىلىك قىلىۋاتقان ئۇيغۇر دىموكراتىيە ۋە كىشىلىك ھوقۇقى فوندى جەمئىيىتى ياكى دۇنيا ئۇيغۇر قۇرۇلتىيىنى ھىچبىر ۋاقىت تېررورچى تەشكىلات، دەپ ئېلان قىلىپ باققان ئەمەس. ماقالىدە پرېزىدېنت بۇشنىڭ رابىيە قادىر كاتتىباشلىقىدىكى قايسى تەشكىلاتنى تېررورچى تەشكىلات،دەپ ئېتىراپ قىلغانلىقىنى تىلغا ئالمىدى. ماقالىدە يەنە ، پرېزىدېنت بۇشنىڭ رابىيە قادىرنى ئۇيغۇرلارنىڭ مۇنەۋۋەر ۋەكىلى، دەپ ماختىغانلىقىنى "بىلجىرلىغانلىقتۇر " دەپ ھۇجۇم قىلدى ۋە رابىيە قادىر خانىمنى چەتئەلدە سەرگەردان بولۇپ يۈرگەن شەرقىي تۈركىستان تېررورچىسى " دەپ ئەيىبلىدى.
پرېزىدېنت بۇش رابىيە قادىر خانىمنى پراگادىكى دۇنيا بىخەتەرلىك ۋە دىموكراتىيە يىغىنىدا "بىر دۆلەتنىڭ يەر ئاستى بايلىقى ۋە ھەربىي كۈچىدىنمۇ قىممەتلىك تالانت ئىگىلىرىدىن بىرى " دەپ ماختىغان.
ماقالىدە يەنە، ئامېرىكىنىڭ 4 شەرقىي تۈركىستان تەشكىلاتىنى تېررورلۇق تەشكىلاتى، دەپ ئېتىراپ قىلغانلىقىنى ئەسكەرتىپ، ئامېرىكىنىڭ ھەرىكىتى ئاۋامنى"ئامېرىكا پرېزىدېنتى قانداق قىلىپ بىر تېررورلۇق تەشكىلاتىنىڭ كاتتىبېشىنى قانات ئاستىغا ئالغاندۇ، دېگەن گۇمانغا كەلتۈردى " دەپ يازغان. قانۇن گېزىتى ماقالىسىدە ئامېرىكىنىڭ 4 شەرقىي تۈركىستان تەشكىلاتىنى تېررورچى تەشكىلات، دەپ تونىغانلىقىنى تەكىتلىگەن بولسىمۇ، لېكىن ئامېرىكا 2002 - يىلى بىر تەشكىلاتنى يەنى شەرقىي تۈركىستان ئىسلام پارتىيىسىنى تېررورلۇق تەشكىلاتلار تىزىملىكىگە كىرگۈزگەن. (ئەركىن)