Уйғур мәсилиси б д т мәдәнийәтләр иттипақи йиғинида оттуриға қоюлди

Б д т ниң көнлики астида қурулған мәдәнийәтләр иттипақи алдинқи күни б д т баш штабида өткүзгән ахбарат елан қилиш йиғинида, уйғурлар дуч келиватқан мәвҗут риаллиқни әйибләйдиғанлиқини билдүрди.

Мәдәнийәтләр иттипақиниң қошумчә рәиси испанийилик федирико майор, бир мухбирниң мәдәнийәтләр иттипақи хитай вәкили пән гуаң билән сөзләшкәндә уйғурлар учраватқан муамилә вә гуантанамодики уйғур тутқунлар мәсилисидә немә ишларни қилди ? дигән суалиға җаваб бәрди. У, "хитайда истибдатлиқ миханизими давамлашмақта " дәйду вә мәдәнийәтләр иттипақи " улар дуч келиватқан мәвҗут риаллиқни әйибләйду," дәп күрсәтти.

Иттипақниң юқири қатлимида хитай вәкилиниң барлиқини тәкитлигән федирико майор, уйғурлар мәсилисидә конкрет немиләрни қилғанлиқини тилға алмиған болсиму, лекин у, иттипақниң доклат һазирлайдиғанлиқини вә б д т баш катипи кофи аннанға " диний мәсилидила әмәс, ипадә әркинлики тоғрисидиму тәклип сунидиғанлиқини" билдүрди.

Мәдәнийәтләр иттипақи 2005- йили б д т ниң көнлики астида испанийә вә түркийиниң тәшәббуси билән қурулған. Чаршәнбә күнки ахбарат елан қилиш йиғиниға иттипақниң икки рәиси испанийилик федирико майор билән түркийә дөләт министири мәмәт айдинлар риясәтчилик қилди. (Әркин)