Xitay da'iriliri az sanliq milletler edebiyatining rawajlinishigha tosqunluq qilmaqta

Xitay axbarat wastiliri yéqinda ürümchide junggu yazghuchilar jem'iyitining xitay bolmighan milletler edebiy ijadiyet söhbet yighini chaqirip, xitayning 12ölkisidin kelgen yazghuchilar we Uyghur aptonom rayon yazghuchilar jem'iyitining mes'ul xadimliri bilen birlikte , az sanliq millet edebiyatini rawajlandurush heqqide pikirleshkenlikini élan qildi.

Xewerde bu qétim ötküzülgen söhbet yighinining mezmuni heqqide éniq melumat bérilmigen bolup, chet'ellerde yashawatqan Uyghur siyasiy erbabliri, nöwette xitay hökümitining daghdughiliq shu'arlar bilen heshemetlik yighinlarni échip , yep ‏- ichip yalghan teshwiqat qilidighanliqini , emeliyette bolsa Uyghur edebiy ijadiyet sahesige qaratqan hujumini kücheytiwatqanliqini bildürmekte.

Chet'ellerde yashawatqan Uyghur yazghuchi we tarixchliri, ilgiri xitay hökümiti merhum tarixshunas, sha'ir turghun almas ependining " Uyghurlar" " hunlarning qisqiche tarixi" we " Uyghur kilassik edebiyati" qatarliq üch kitabini yighiwélip, tarqitishni chekligenlikini tekitlep, xitayning buninggha oxshash ri'alliq eks ettürülgen, Uyghur tarixigha a'it edebiy eser yaki tarixiy eserlerni cheklesh heriketlirini izchil dawamlashturuwatqanliqini, gerche hökümet shekilde az sanliq milletler edebiyatini rawajlandurush we uninggha köngül bölüsh toghrisida jar sélip kelgen bolsimu , emma Uyghurlarning erkinliki, siyasiy hoquqi we tarixiy kélip chiqishigha a'it eserlerning neshr qilinishini qattiq kontrol qilip, Uyghurlarni metbu'at we söz erkinlikidin mehrum qaldurghanliqini körsetti. (Eqide)