Xitay diniy étiqadni "inaq jem'iyet" üchün xizmet qildurmaqchi

3- Mart düshenbe küni béyjingda ötküzülgen muxbirlarni kütüwélish yighinida, xitay memliketlik siyasiy kéngeshning re'isi,kompartiye siyasiy byurosining da'imiy ezasi jiya chinglin dinni inaq jem'iyet üchün xizmet qildurush kérek ikenlikini otturigha qoydi.

Jiya chinglin muxbirlarni kütüwélish yighinida: " biz diniy étiqad erkinliki siyasitige toluq kapaletlik qilip, diniy ishlargha alaqidar belgilimilerdin paydilinip diniy zatlar we din'gha étiqad qilghuchilarni yéteklesh arqiliq bularni inaq jem'iyet berpa qilish üchün ijabiy rol oynitishimiz kérek" dédi.

1949- Yili xitay kommunistliri hakimiyet béshigha chiqqandin kiyin, até'izmni terghib qilip, din'gha ishinishni qattiq cheklep kelgen bolsimu, emma roytérsta körsitilishiche, yéqinqi yillardin buyan xitayda buddizm, teriqetchilik, xristi'an dinlirigha ishen'güchiler mu'eyyen derijide köpeygen bolup, bu xil ehwal xitay hökümitini " inaq jem'iyet" berpa qilishta üzlüksiz köpiyiwatqan bu dindarlar guruppilirighimu tayinishqa mejburlighan.

Emma xitay rehberliri diniy étiqadtin " inaq jem'iyet " berpa qilish üchün paydilinish kéreklikini otturigha qoyuwatqan peytlerde, Uyghur ilidiki musulmanlargha qaratqan qattiq basturush siyasitini téximu kücheytmekte.

Bu heqte amérika diniy erkinlik komitéti, xelq'ara kishilik hoquq komitéti we xelq'ara kechürüm teshkilati qatarliq organlar hemde gherb döletlirining munasiwetlik tarmaqliri bayanat élan qilip yaki ispat bérish yighinlirini uyushturup, xitay hökümitining Uyghur musulmanlirigha qaratqan basturush siyasetlirini toxtitishi we olimpik yighini üchün bergen wedisige emel qilishi üchün bésim ishletmekte.(Jüme)