ئۇيغۇر رايونىدا نۇقتىلىق قولغا ئېلىش ئوبيېكتى دەپ قارالغان 124 كىشى تۇتقۇن قىلىنغان

ئۇيغۇر رايونلۇق جامائەت خەۋپسىزلىك نازارىتى بۈگۈن 24 ‏ - ئاپرىل كۈنى يېقىنقى ئايلاردىن بېرى داۋاملاشتۇرۇۋاتقان تۇتقۇن قىلىش ھەرىكەتلىرى ھەققىدە ئاخبارات ئېلان قىلىش يىغىنى ئاچقان. يىغىن مەلۇماتىدا بىلدۈرۈلۈشىچە ساقچى دائىرىلىرى يېقىنقى ئۈچ ئاي ئىچىدە 615 كىشىنى قولغا ئالغان، بۇلاردىن 124 نەپىرى نۇقتىلىق قولغا ئېلىش ئوبيېكتى دەپ قارالغان كىشىلەر.
مۇخبىرىمىز شۆھرەت ھوشۇر خەۋىرى
2008.04.24

 ساقچى دائىرىلىرى يىغىندا، بۇ يىل 1 ‏ - ئايدىن 3 ‏ - ئايغىچە بىرىنچى پەسىللىك " ئوغرى - قاراقچىلارغا زەربە بېرىش ۋە قاچقۇنلارنى تۇتۇش ھەرىكىتى" ئېلىپ بارغانلىقىنى ئېلان قىلغان. دائىرىلەر 8 ئاي داۋام قىلىشى پىلانلانغان بۇ ھەرىكەتنىڭ غايىسىنى بېيجىڭ ئولىمپىك ئىناق ۋە مۇقىم جەمىيەت مۇھىتى بەرپا قىلىش دەپ چۈشەندۈرگەن. ئەمما قانداق كىشىلەرنىڭ نۇقتىلىق قولغا ئېلىش ئوبيېكتى سانىلىدىغانلىقى ھەققىدە ئىزاھات بەرمىگەن.

خىتاي جامائەت خەۋپسىزلىكى مىنىستىرلىكى ئىككى ھەپتىنىڭ ئالدىدا بايانات ئېلان قىلىپ، ئۇيغۇر رايونىدا ئولىمپىككە بۇزغۇنچىلىق قىلىشنى پىلانلىغان ھاجى مۇھەممەد ۋە ئابدۇراخمان تۇرسۇن باشچىلىقىدىكى ئىككى تېررورچىلار گۇرۇھىدىن 45 كىشىنى قولغا ئالغانلىقىنى بىلدۈرگەن ئىدى.

بۇ ئىككى گۇرۇپپىنىڭ تۇتقۇن قىلىنغان ۋاقتى، خىتاينىڭ بۈگۈنكى دوكلاتىدا بىلدۈرۈلگەن ھەركەت ۋاقتى بىلەن ئوخشاش ۋاقىتقا توغرا كەلمەكتە. بۇ ئەھۋال، نۇقتىلىق تۇتقۇن قىلىش ئوبېكتىنىڭ شەرقى تۈركىستان مۇستەقىللىق كۈچلىرى بولۇش ئېھتىماللىقىنى كۆرسەتمەكتە.

دۇنيا ئۇيغۇر قۇرۇلتىيى خىتاي دائىرىلىرى ھەرخىل ناملار ئاستىدا ئېلىپ بېرىۋاتقان زەربە بېرىش ۋە تۇتقۇن قىلىش ھەرىكەتلىرىنى ئوخشىمىغان سىياسىي كۆز قاراشتىكىلەرنى تۇتقۇن قىلىش دەپ ھەم بۇنى خەلقئارا قانۇنلارغا خىلاپ دەپ ئەيىبلەپ كەلمەكتە.
ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭ
ئۇيغۇر خەۋەرلىرى
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.