Уйғур елидә қизил кесилиниң тарқилиш нисбити өрлимәктә


2008-02-04
Share

Хитай ахбаратлирида көрситилишичә, уйғур аптоном районлуқ сәһийә назарити 2007- йили 12- айда уйғур илидики а вә б типлиқ юқумлуқ кесәлликләр әһвалини ашкарилиған болуп, мәлум болушичә, 12- айда уйғур елидә көрүлгән қизил кесили 1149 нәпәр, бу кесәлдә өлгән адәм икки нәпәр болуп, бу сан 11- айдикигә селиштурғанда 1.66 Һәссә өрлигән.

Тәңритағ торида хәвәр қилинишичә, 2007- йили 12- айғичә пүтүн уйғур елидә тизимға елинған қизил кесилиниң омуми сани 13 миң 334 нәпәргә, өлгән адәм 20 нәпәргә йәткән.

2007- Йили 12- айда юқум әһвалида өрләш болған кесәлликләр, қизил көк йөтәл вә менингит болуп, шу йили 11- айдикигә қариғанда айрим-айрим һалда 1.66, 2.17 Вә 2.85 Һәссә болған.

Униңдин башқа юқум әһвали алдинқи 3- орунда туридиған кесәлликләрдин йәнә, тарқилишчан бадамсиман бәз яллуғи, юқумлуқ ич өткү қатарлиқлар бар.

Хәвәрдә аптоном районлуқ сәһийә назаритидики мунасвәтлик хадимларниң ейтқанлиридин нәқил кәлтүрүп көрситишичә, һазир уйғур елидә юқумлуқ нәпәс йоллири кесәлликлири тарқилидиған пәсил болуп, бу хил кесәлликләр ғулҗа шәһири, текәс, күнәс наһийилиридә қизил вә көк йөтәлниң юқум әһвали бир қәдәр юқири икән.

Мәлум болушичә, қизил вә башқа нәпәс йоли юқумлуқ кесәлликиниң үнүмлүк дориси техичә байқалмиған болуп, ваксина әмләш уларниң алдини елиштики әң үнүмлүк чарә икән. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт