Хитай уйғур елидә нефит елишни көпәйтмәктә

Хитай уйғур ели нефит вә тәбиий газлирини ечиш вә пишшиқлап ишләш қәдимини йәнә күчәйткән болуп, мәлум болушичә, бу йил уйғур елидә ишләп чиқирилған омуми нефит вә тәбиий газ миқдари бултурқидин көрүнәрлик ашқан.

Тәңритағ торида хитайниң уйғур елидики һөкүмитиниң рәиси исмаил тиливалдиниң ейтқанлиридин нәқил елип көрситишичә, 2007- йили уйғур елидә ишләпчиқирилған омумий нефит миқдари 26 милйон 100 миң тонна болуп, алдин йилдикидин 5.5 Пирсәнт, тәбиий газ 21 милярд куб метир болуп, алдин йилдикидин 9.27 Пирсәнт ашқан.

Хәвәрдә көрситилишичә, уйғур ели нефит башқуруш идариси йеқинқи бирнәччә йиллардин буян хитай һөкүмитиниң уйғур ели нефит запаслирини қезиш ишлириға мәбләғ селишни күчәйткәнлики һәмдә "ғәрбниң газини шәрққә йөткәш" ишлиридики муқимлиққа мас һалда уйғур елидә нефит ишләп чиқириш миқдариниң һәссиләп ашқанлиқи вә тәбиий газ ишләп чиқиришниң "шиддәт билән" ашқанлиқини билдүргән.

Хәвәрдә ашкарилинишичә, 2007- йили уйғур елидә нефит вә химийә саити орундиған омуми ишләп чиқириш қиммити 200 милярд 450 милйон йүәндин ешип кәткән.

Пәқәт уйғур ели нефит саһәси яратқан пайда һәққидә сөз ачқан дуня уйғур қурултийи баянатчиси дилшат ришит, бу байлиқлардин йәрлик аһалиниң азрақму мәнпәәткә еришиш уяқта турсун, һәтта уйғур наһийилиридә қурулуватқан нефит завутлириға йәрлик уйғурларниң ишчилиққиму кирәлмәйдиғанлиқини тәкитлиди

У мундақ деди: "хитайлар уйғур елидә нефит вә тәбиий гази ишләпчиқириш қәдимини һәр йили тезләтмәктә вә пишшиқлап ишләш завутлири кәң көләмдә кеңәйтмәктә. Әмма йәрлик уйғурлар нефит санаитидин пайдиға еришиш уяқта турсун һәтта өз мәһәллисигә қурулуватқан завутлириниң ишикигиму йеқин келәлмәйду"

У йәнә уйғур елидә хизмәт пурситиниң шунчә кәңри болушиға қаримай хитайниң йеқиндин буян уйғур қизлирини аталмиш "деһқанларниң киримни ашуруш үчүн, уйғур яшлирини ичкири өлкиләргә апирип ишқа орунлаштуруш" сияситини йүргүзүп уйғур қизлирини хитай өлкилиригә елип кетиватқанлиқиниң аңлиғанлики кишини әҗәбләндүридиғанлиқини қошумчә қилди. (Җүмә)