Д у қ қәшқәр шәһиридә 1800 кишилик аманлиқ сақлаш әтрити қурулғанлиқини қаттиқ әйиблиди


2008-02-04
Share

1 ‏- Феврал күни қәшқәр шәһиридә 1800 кишилик җәмийәт аманлиқини қоғдаш чарлаш әтрити қурулған болуп, дуня уйғур қурултийи мәзкур әтрәтниң уйғурлар үстидин назарәт қилиш үчүн қурулғанлиқи, уйғурларниң әркинликини техиму боғидиған қисим икәнликини көрситип, қәшқәрдә турушлуқ хитай һөкүмитиниң бу қилмишини қаттиқ әйибләйдиғанлиқини билдүрүп баянат елан қилди. Қәшқәр һөкүмәт хәвәрләр торида берилгән хәвәрдә, мәзкур чарлиғучи әтрәтниң асасий вәзиписи қанунсиз диний паалийәтниң алдини елиш вә тосуш, коча вә мурәккәп йол еғизлириниң аманлиқини контрол қилиш, ақма нопус вә иҗарә бериш ишлирини назарәт қилиш икәнлики көрситилгән.

Бу һәқтә тохталған д у қ баянатчиси дилшат ришит мундақ деди: " һазир уйғур елиниң җәмийәт аманлиқини әмәлийәттә хитай көчмәнлири бузуп келиватиду. Хитайларниң бу йәрдә көрситиватқини җәмийәт аманлиқи болмастин, бәлки уйғурларниң нормал диний етиқад паалийитини чәкләш, уйғурларни қорқутуш вә миллй ирадисини сундуруштин ибарәт ".

У йәнә, һазир қәшқәрдә хитайниң азадлиқ армийиси, чегра сақлаш қисимлири, қораллиқ сақчи қисимлири, җамаәт хәвпсизлик қисимлири, биңтуәнниң қораллиқ қисимлири вә хәлқ әскәрлиридин ибарәт қисимлири қәшқәр хәлқини һәр тәрәптин контрол қилип туруватқан шараитта йәнә, пәқәт қәшқәр шәһириниң ичини чарлашни мәқсәт қилған мундақ бир қисимниң қурулуши уйғурларниң кишилик һоқуқиниң техиму еғир дәхли ‏- тәруз қилиниватқанлиқини көрситидиғанлиқини билдүрди.

Дилшат ришит ахирида, бу 1800 кишилик чарлаш қисимлириниң пәқәт қәшқәр шәһәр ичини чарлашқа орунлаштурулғанлиқини, әмма қәшқәр вилайити тәвәсидики башқа наһийә вә йезилардики шу хил вәзипә буйичә уйғурларни назарат вә контрол қилип келиватқан қисимларниң санини мөлчәрләшниң қийин икәнликини оттуриға қойди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт