Хитай һөкүмити уйғур елидә сиясий түскә игә вә қанунсиз диний нәшр буюмлириға зәрбә беришни күчәйтмәкчи


2008-03-17
Share

17 - Март күни үрүмчидә "сериқ вә сахта мәһсулатларға зәрбә бериш " телевизийә йиғини ечилған болуп, йиғинда сиясий түскә игә вә "қанунсиз" диний нәшр буюмлириға зәрбә беришни бу йиллиқ хизмәтниң муһим нуқтиси қилип техиму күчәйтиш оттуриға қоюлған.

Тәңритағ хәвәр торида көрситилишичә, уйғур аптоном райони партком тәшвиқат бөлүминиң башлиқи 2007 - йиллиқ "сериқ вә сахта мәһсулатларға зәрбә бериш" хизмитини хуласиләш йиғинида, җәмийәтниң муқимлиқи вә дөләтниң бихәтәрликини қоғдаш үчүн сиясий түскә игә вә қанунсиз диний нәшр буюмлириға зәрбә беришни 2008 - йиллиқ хизмәтниң муһим нуқтиси қилиш тоғрилиқ йолйоруқ бәргән.

У йәнә, мәркәзниң бу һәқтики орунлаштурушини уйғур елиниң әмәлий әһвалиға маслаштуруп "зәрбә бериш хизмитиниң қаратмилиқини күчәйтип, нуқтилиқ район, нуқтилиқ тәрәп вә нуқтилиқ хизмәт" қатарлиқларни гәвдиләндүрүп чиң тутуш керәкликини көрсәткән.

Хәвәрдә көрситишичә, 2007 - йиллиқ "сериқ вә сахта мәһсулатларға зәрбә бериш" җәрянида уйғур елидә 1милйон 810 миң парчә нәшр буюми йиғивелинған 915 сетиш орни печәтләнгән һәмдә нәшр қилиш орунлири 6435 қетим тәкшүрүлгән.

Дуня уйғур қурултийи баянатчиси дилшат ришитниң билдүрүшичә, сериқ вә сахта мәһсулатларға зәрбә бериш әслидә, хәлқ турмушиға пайдилиқ һәмдә истемалчиларниң һоқуқини қоғдайдиған яхши иш болсиму, әмма һазир хитай һөкүмити "сериққа зәрбә бериш" ниқаби астида уйғур елидә диний нәшр буюмлириға зәрбә беришни мәқсәт қилған икән.

Дилшат ришит "хитай һөкүмити бу хил хизмәтлирини һәқиқий маһийити буйичә тоғра йүргүзүши керәк" дәп көрсәтти. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт