Xitay hökümiti Uyghur yéza éshincha emgek küchlirini sirtlargha yötkesh pilanini jiddiy élip barmaqta

Xitay da'iriliri Uyghur éli yéza éshincha emgek küchlirini sirtlargha yötkep ishqa orunlashturush pilanining bu yilliq qismida , yeni yil axirighiche Uyghur élining jenubiy rayonini asas qilip Uyghur yéziliridin bir milyon ikki yüz ming yashni xitay ölkilirige yötkep ishqa orunlashturushni pilan qilghan idi.

Uyghur éli xewerliridin ashkarilinishiche, bu yilning aldinqi yérimida Uyghur éli yéziliridin xitay ölkilirige yötkep kétilgen yéza éshincha emgek küchliri 900 minggha yetken bolup, buning ichide qeshqer we xoten wilayitidin yötkelgenler sani 450 minggha yétidiken. Nöwette , xitayning bu yil axirghiche bir milyon ikki yüz ming emgek küchini xitay ölkilirige yötkesh pilanini emeliyleshtürüsh üchün yerlik da'iriler dawamliq jiddiy türde heriket qiliwatqan bolup, bezi yézilardiki toluqsiz hem toluq ottura mekteplerde oqughuchilarni bolupmu qiz oqughuchilarni mexsus kespiy téxnika ma'aripi buyiche terbiyileshni kücheytip , xitaygha yötkilidighan zapas adem küchi üchün teyyarliq körmekte iken.

Nöwette Uyghur élide emgek küchini sirtlargha yötkeshte ülgilik nahiye 21 ge yetken . Bu nahiyiler asasen Uyghurlar zich olturaqlashqan qeshqer ,xoten hem aqsu qatarliq wilayet we qizilsu oblastidiki nahiyiler .

Gerche xitay hökümiti , xitay ölkilirige yötkelgen Uyghur qizlirining barghan zawut ‏- karxanilirida yaxshi kirim qiliwatqanliqini teshwiq qiliwatqan bolsimu, emma xitay ölkiliridiki zawutlargha barghan bezi Uyghur qizlarning inkas qilishigha qarighanda , xitayning yéza éshincha emgek küchlirini yötkesh pilani mejburiy yosunda yüzgüzülüwatqandin bashqa , xitay zawutlirida Uyghur qizlirining emgek hem insaniy heq ‏- hoquqliri éghir dexlige uchrimaqta iken. (Gülchéhre)