Isma'il tiliwaldi re'islik wezipisidin tuyuqsiz istipa berdi

Uyghur aptonom rayonining re'isi isma'il tiliwaldi jüme küni re'islik wezipisidin tuyuqsiz istipa berdi. Shinxu'a axbarat agéntliqining eskertishiche, Uyghur aptonom rayoni 10 - nöwetlik xelq qurultiyining 13 - yighini isma'il tiliwaldining istipanamisini qobul qilip, uning ornigha aptonom rayon partkomining mu'awin sékritari nur bekrini muweqqet re'islikke teyinligen. Lékin xewerlerde isma'il tiliwaldining néme sewebtin istipa bergenlikini tilgha almidi.

Nur bekrining isma'il tiliwaldining ornigha desseydighanliqi uzundin béri kishilerning perizidiki mesile bolsimu, lékin közetküchiler isma'il tiliwaldining wezipe mudditini toshturmay turupla bundaq téz istipa bérishini oylap baqmighan. Bezi közetküchiler kéyinki mezgillerde isma'il tiliwaldining wang léchüen bilen piyizi pishmay qalghanliqini bildürmekte. U, medeniyet inqilabidin kéyin Uyghur aptonom rayonida re'islik wezipisi ötep 1 - qarar wezipe mudditini toshquzmay turupla wezipisidin istipa bergen tunji yerlik kadir.

Isma'il tiliwaldining wezipisini tapshuruwalghan nur bekri 1961 - yili börtalada tughulghan bolup, 1983 - yili shinjang uniwérsitétining siyasiy penler pakultétini püttürgen idi. U hazirqi orun'gha ösken'ge qeder qeshqer wilayitining mu'awin walisi, ürümchi shehirining sheher bashliqi, siyasi qanun komitétining mu'awin sékritari qatarliq wezipilerde olturghan. Nur bekri Uyghur aptonom rayoni partkomining siyasi - idé'ologiye xizmitige mes'ul sékritari idi.

Közetküchilerning eskertishiche, u Uyghur kadirlar ichidiki milliy ma'aripni xitaychilashturush, mekteplerde diniy ibadet pa'aliyitini cheklesh we atalmish "milliy bölgünchilikke" qarshi turush herikitide eng esebiy kadirlarning biridur. (Erkin)