Uyghur élide yürgüzülüwatqan "2007 ‏- yilliq bahar shamili" Uyghurlarning qattiq naraziliqini qozghidi

• Muxbirimiz eqidening bu heqtiki toluq melumati
• Download story audio

Xitay da'irilirining Uyghur élide üch yildin béri yürgüzüwatqan "2007 ‏- yilliq bahar shamili" herikiti, chet'ellerdiki Uyghurlarning qattiq naraziliqini qozghidi. Uyghurlarning kishilik hoquqi we erkinlikini qolgha keltürüsh yolida pa'aliyet élip bériwatqan dunya Uyghur qurultiyi we amérika Uyghur birleshmisi, Uyghurlardiki ishsizliq we bu tüpeyli zor türkümde xitaygha élip kétiliwatqan ayal éshinchi emgek küchliri mesilisi, buning eksiche xitaydin Uyghur élige yötkep kéliniwatqan aqqunlar mesilisi qatarliqlarning nöwette Uyghur jama'etchiliki oylinishqa tégishlik muhim mesile ikenliki we buning aldini élish toghrisida chaqiriq qildi.

Xitaygha ish bar, Uyghurgha yok

Uyghur élide nöwette ishsizliq mesilisi éghir derijide ewj éliwatqan, xitay da'iriliri Uyghur yash qiz - chokanlarni asas qilghan emgek küchlirini, xitay ölkiliridiki zawut ‏- karxanilargha türküm - türkümlep yolgha séliwatqan bir peytte "2007 ‏- yilliq bahar shamili" herikiti astida 370 din artuq idarining, 137 xil xizmet we 30 mingdin artuq ish ornini tonushturup, xitay ölkiliridin kelgen aqqun ishlemchilerge qolayliq shara'it yaritip bérishi, chet'ellerde Uyghurlarning kishilik hoquqini qolgha keltürüsh yolida pa'aliyet élip bériwatqan teshkilat xadimlirining tenqidige yol achti.

Istansimiz muxbirlirining biwaste Uyghur élidin igiligen melumatliridin , ishzhliq hemde namratliq sewebidin bir qisim déhqanlar amalsiz , özlirining téxi yatliq bolmighan qizlirini, xitay ölkiliridiki zawutlarda ishlep pul tépishqa ewetishke mejbur bolghan bolsa , yene bir qisim déhqanlarning hökümet bilen til biriktürgen yerlik yéza bashliqlirining qéyin - qistaqliri astida qizlirini xitaygha yolgha sélishqa mejbur bolghanliqi ashkarilanmaqta.

Uyghur teshkilatlirining inkasi

Amérika Uyghur birleshmisining bash katipi alim séyitof ependi, Uyghur élide yüz bériwatqan mezkür mesile mushundaq dawamlishiwerse, elwette axiri bir küni xeliqning hökümetke bolghan küchlük naraziliqigha seweb bolidighanliqini bildürdi.

Dunya Uyghur qurultiyining mu'awin re'isi memet toxti ependi, Uyghur élide hoquq yürgüzüwatqan Uyghur emeldarlarning öz wijdanigha hakim bolushini, millitining xorluq we zulumlirigha köz yumush jinayitining axiri bir küni hésabi sorulidighanliqini éytti.

Qizimni hergiz ewetmeymen!

Ziyaritimizni qobul qilghan Uyghur élidiki bir déhqan, meyli qandaq kün'ge qélishtin qet'iy nezer, öz qizini hergiz xitay ölkisige ewetmeydighanliqini, choqum qizigha ige chiqidighanliqini éytti.

Emma tirikchilik helekchilikide qalghan nurghunlighan Uyghur déhqanlar, yenila qizlirini xitay ölkilirige ewetishke mejbur bolmaqta. Uyghur siyasiy közetküchilerning éytishiche, eger xitay ölkilirige i'ishqa orunlashturush bahanisida Uyghur qizlirini yötkesh ishliri izchil dawamlashsa, Uyghur millitining xitay hökümiti teripidin assimilyatsiye qilinish qedimi tézliship, eslige keltürgili bolmaydighan éghir aqiwetler meydan'gha kélidiken. (Eqide)