Uyghur élide aspérantliqqa iltimas qilghuchilarning omumi sani azaydi, lékin yerlik iltimaschilar köpeydi

Uyghur aptonom rayonida 2008 - yilliq aspirantliq imtihanigha qatnishishni iltimas qilghuchilarning omumi sani yéqinqi 7 yildin béri tunji qétim azayghan bolsimu, lékin yerlik milletlerde aspérantliqqa iltimas qilghuchilar köpeygen.

Xitay metbu'atlirining eskertishiche, bu yil Uyghur aptonom rayoni buyiche 12480 neper adem aspérantliqqa iltimas qilghan bolup, xewerlerde buning ötken yilqidin 133 adem azayghanliqini, lékin yerlik milletlerde iltimas qilghuchilarning sanida köpiyish bolghanliqini bildürdi.

"Tengritagh tori" da 2008 - yilliq aspirantliq imtihanigha iltimas qilghuchi yerlik milletlerning sanini 3243 neper, dep élan qilghan we bu san omumi sanning%26 ni igileydighanliqini ilgiri sürgen. Xitaylar Uyghur aptonom rayoni nopusining%42 ni igilishige qarimay, aspérantliqqa imtihan bérishke tizimlatqanlarning texminen % 75 ni shular igilimekte. " Tengritagh tori" ning bu heqtiki bir xewiride, bu yil aspirantliq imtihanigha yerlik milletlerdin 317 adem köp tizimlatqanliqini bildürdi. Lékin közetküchilerning eskertishiche, bu éshishni Uyghurlarning rayondiki nopusi we tibetlerge sélishturghanda köp dégili bolmaydu.

Tibet aptonom rayonida 2008 - yilliq aspirantliq imtihanigha tizimlan'ghanlarning omumi sani 1965 neper bolup, bu san Uyghur élide tizimlan'ghan yerlik milletlerdin köp bolmisimu, lékin bu yil tibetliklerning aspérantliqqa iltimas qilish nisbiti ötken yilqidin %87 ashqan. Közetküchiler, Uyghur aspérantlarning köpiyelmeslikige oqush püttürse xizmet tépishning qiyinliqi sewebchi boluwatqanliqini bildürmekte. (Erkin)