Давут раваб вапат болди


2007.11.18

Уйғур һазирқи заман миллий музика саһәсидики даңлиқ шәхсләрдин бири, бир өмүр уйғур вази раваб билән хәлқ нахша- музикилирини орундап, раваб челиштики маһирлиқи билән хәлқ тәрипидин " давут раваб" дегән намға сазавәр болған давут авут әпәнди 11-айниң 17-күни чүштә үрүмчи шәһиридә кесәл билән вапат болди һәмдә 18-ноябир күни мәрһумниң намизи үрүмчидики ноғай мәсчити дәп аталған мәсчитдә чүшүрүлгәндин кейин дәпнә қилинған.

Раваб челиш маһарити камаләткә йетип, хәлқ ичидә, болупму сазәндиләр арисида зор шөһрәт вә һөрмәткә сазавәр болған һәмдә раваб шаһи вә раваб челиш устиси дәп тәрипләнгән давут әпәнди пүтүн һаятини уйғур миллий сәнитигә беғишлиған болуп, униң қолида көплигән шагиртлар йетишип чиққандин сирт у " ташвай", "мениң равабим" қатарлиқ нәччә онлиған хәлқ музикилирини вәтән ичи-сиртида камаләткә йәткүзүп, орундап аңлиғучиларға унтулмас тәсиратларни қалдурған иди.

Уйғур мәдәнийәт әрбаблири мәрһум давут авутниң уйғур хәлқиниң миллий музика сәнәт тарихида униңдин илгири вапат болған турдахун, ғиясиддин барат, искәндәр сәйпулла, нурмуһәммәд турсун қатарлиқ нәччә онлиған намайәндиләр билән бир қатарда орун тутидиғанлиқини билдүрүшмәктә. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.