Tarim néfitlikide tebi'iy gaz ishlepchiqirish aldinqi yildikidin 40 pirsent ashqan

Xitay axbarat wasitiliri bergen xewerlerdin ashkarilinishiche, bu yil Uyghur élide xitay ishlepchiqarghan tebi'iy gaz miqdari 15.5 Milyard kub métirgha yétip, bulturqidin 40 pirsent örligen.

Tarim néfitliki xitay döletlik néfit guruhining bashqurushida bolup, 2006- yili 11 milyard kub métir gaz ishlep chiqarghan idi.

Shinxu'a agéntliqida körsitilishiche, xitay tarim néfitlikidin xitay ölkilirige bu yil kirgendin bashlap 19- dékabirghiche 12 milyard kub métir tebi'iy gaz toshup ketken bolup, néfit shirkitining bildürüshiche, " gherbning gazini sherqqe yötkesh turuba liniyisi" bu yil axirghiche xitaygha jem'iy 13.7 Milyard kub métir tebi'iy gaz yetküzüp bulturqidin 9.8 Milyard kub métir ashuridiken.

Tarim néfitlikidin bashlinip xitayning shangxey shehiridiki beyxé yézisigha tutishidighan 4200 kilo métirliq bu turuba liniyisi eslide yiligha 12 milyard kub métir tebi'iy gaz yötkesh iqtidarigha ige qilip layihilen'gen bolup, bu yil bu turuba liniyisi toshughan gaz belgiligen chektin éship ketken.

Ashkarilinishiche, 560 ming kwadrat kilométir kengliktiki tarim oymanliqida 526 milyon tonna néfit zapisi we 724 milyard kob métir tebi'iy gaz zapisi barliqi ispatlan'ghan. (Jüme)