Пул - муамилә вақти гезити: шинҗаңниң нефит байлиқи уйғурларниң ғәзәп нәпритигә пилтә яқти

Әнгилийә "пул - муамилә вақти" гезитиниң мухбири җүмә күни корлидин хәвәр берип, уйғур елидә нефит игиликиниң тәрәққияти уйғурларға мәнпәәт елип кәлмәй, уларниң ғәзәп нәпритигә пилтә яққанлиқини билдүрди.
Мухбиримиз әркин хәвири
2008-08-29
Share

 Хәвәрдә 2000 - йилдин 2007 - йилға қәдәр тарим ойманлиқидин қезилған тәбиий газ миқдариниң 20 һәссә ашқанлиқи, лекин нефит вә тәбиий газдин киргән киримниң шәрқтики районларға йолланғанлиқини илгири сүрди.

Хәвәрдә әскәртишичә, 2005 - йили райондики нефит - химийә игиликидин киргән омуми баҗ кирими 14милярд 800 милйон йүән болсиму, лекин шинҗаңдики йәрлик һөкүмәтләргә аран 240 милйон йүән тәгкәнликини билдүрди. Хәвәрдә корлидики бир йәрлик кадирниң бу җайдики нефит ширкәтләр тоғрисида ейтқан сөзлиригә йәр берилгән болуп, бу кадир" бизниң уларға гепимизни өткүзүшкә һоқуқимиз йәтмәйду, улар пәқәт бейҗиңдики хоҗайинлириниңла гепини аңлайду," дәп тәкитлигән.

Хәвәрдә йәнә корлидики бәзи хитай көчмәнлириниң көз қаришиға йәр берилгән. Ата аниси 1950 ‏ - йилларда хунәндин корлидики бомба завутида ишләшкә әвәтилгән шйе пәмилилик бир дукандар мундақ дәйду: "нурғун уйғурлар бу җайни өзиниң дәп қарайду, лекин һазир улар бу җайда ят адәмләргә айлинип қалди ... Шуңа уларниң бәзилириниң буниңға наһайити аччиқи бар. Улар күндин күнгә аваригәрчилик туғдурмақта."

Хәвәрдә уйғурларниң нефит саһәсидин пүтүнләй йәкләнгәнлики, нефитликтики төвән дәриҗилик ишларни қилидиған наһайити аз сандики бир қисим уйғурлардин сирт, башқуруш органлирида уйғурларға орун йоқлиқини әскәртти. Хәвәрдә пенсийигә чиққан ма пәмилилик бир хизмәтчиниң мундақ дегәнликини язиду": нефит ширкитиниң бурғусида ишләйдиған 2 уйғур ишчи бар иди, лекин улар башқа йәргә йөткиветилди. Чүнки башлиқлар мусулманларни бөлгүнчи яки террорист, дәп ойлайду."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.