Uyghur putbolchilar ghalip chiqti

Uyghur élide yash-ösmürlerning putbol herikiti janlanmaqta, yéqinqi yillardin buyan Uyghur élining her qaysi wilayetliride shexslerning putbol komandiliri qurulushqa bashlighan bolup, Uyghur élining ichi -sirti boyiche ötküzülgen musabiqilerde körünerlik netijiler qolgha keltürülgen.

Igileshlerge qarighanda, 30-iyun küni ürümchidiki tenterbiye merkizide ötküzülgen shinjang latariye putbol komandisi bilen tyenjin parawuz putbol komandisi arisida ötküzülgen musabiqide shinjang latariye komandisi ikkige qarshi üch netije bilen tyenjin parawuz komandisini yenggen. Musabiqe jeryanida kapitan perhat qatarliq ezimetler alahide maharitini namayen qilip, reqib komanda üstidin ghelibe qazinishta muhim rol oynighan.

Musabiqini körüshke bir qanche ming top mestanisi kelgen bolup, ularning zor köpchilikini Uyghur top mestaniliri igiligen , ular shinjang latariye komandisigha küchlük medet bergen. Inkaslargha qarighanda, mezkur ghelibe bilen shinjang latariye komandisi xitaydiki "b " derijilik komandilarning aylanma musabiqiside shimaliy rayonlar boyiche aldinqi orun'gha ötken.

Ötken esirning 50-60-yillirida Uyghur élide köpligen meshhur tenheriket mahirliri yétiship chiqqan bolup, ayal walibolchilardin zöhre, er walibolchilardin malik hemde 90-yillarda dang chiqarghan waskétbol mahiri adiljan qatarliqlar xitay boyiche eng aldinqi qatardiki topchilar bolup hésablan'ghan idi. Bulardin bashqa yene chélish, boks türliri boyichimu Uyghur mahirliri chémpiyon atalghan idi.

Atushning iksaq kentidiki Uyghur déhqan putbolchilirining ötken esirning 20-yillirida qeshqerdiki shwétsiye, en'giliye konsulxana putbolchiliri bilen musabiqiliship, ularni utuwalghanliqining Uyghurlargha küchlük meniwi ilham bolghanliqi melum. (Ümidwar)