Уйғур ели сичүәнликләргә 83 милйон йүәндин артуқ пул ярдәм қилди

 Һөкүмәт вә партийә органлириниң бир туташ чақириқи вә бәлгилимисигә бинаән уйғур елиниң пүтүн йеза - қишлақлириғичә ярдәм топлаш паалийити уюштурулғанлиқи мәлум. Шинхуаниң 17 - май күни елан қилишичә, уйғур дияридин ярдәмгә топланған пулниң сани 83милйондин ашқан болуп, әлвәттә, буниң ичигә қизил крест җәмийити йиғқан ярдәмләр киргүзүлмигән. Әгәр уни һесаблиғанда, омумий санниң техиму коп болуши мумкин икән.

Хәвәрдә ейтилишичә, нәқ пулдин башқа йәнә бир милйон 570 миң йүән қиммитидә мадди буюмларму топланған болуп, нөвәттә, ярдәм нәқ пул вә маддий буюмлири давамлиқ көпәймәктә икән. Уйғур елидин тарқитилидиған тор бәтләрдики учурлардин қариғанда, һөкүмәтниң тәшкиллиши билән қумул вилайитиниң мәлум йезисидики деһқанлар 20 миң данә нан тәйярлап, сичүәнгә әвәткән.

Һәтта 2003 - йили, 24 - мартта қаттиқ йәр тәврәш йүз берип, 270 дин артуқ адәм өлгән, нурғун адәм яриланған һәм өй макансиз қалған маралбеши наһийисиниң чоңқурчақ йезисидики, йиллиқ кирими хитайниң башқа өлкилиригә һәтта сичүәнгә селиштурғандиму көп төвән һесаблинидиған деһқанлар кәнт партком секритари, йәр тәврәштә аилисидики бәш адәмдин айрилған һәмдә хитай баш министири венҗябавниң ғәмхорлуқиға еришкән давут һашимниң башламчилиқида пул топлашқа киришип, қисқиғина вақит ичидә 100 миң йүән йиғилған.

Техи апәтниң зәрбисидин толуқ қутулалмиған һәм өзини оңшап болалмиған, хитай бойичә әң кәмбәғәл адәмләр һесаблинидиған чоңқурчақлиқлар сичүәндики апәткә учриған хәлқләргә инсанпәрвәрлик ярдимини сунған. Әмма, бу хил ианә топлашниң наһийә - йеза актип кадирлири тәрипидин мәлум дәриҗидә мәҗбурий түс алдуруливатқанлиқи һәққидиму инкаслар пәйда болмақта.