Uyghur éli sichü'enliklerge 83 milyon yüendin artuq pul yardem qildi

 Hökümet we partiye organlirining bir tutash chaqiriqi we belgilimisige bina'en Uyghur élining pütün yéza - qishlaqlirighiche yardem toplash pa'aliyiti uyushturulghanliqi melum. Shinxu'aning 17 - may küni élan qilishiche, Uyghur diyaridin yardemge toplan'ghan pulning sani 83milyondin ashqan bolup, elwette, buning ichige qizil krést jemiyiti yighqan yardemler kirgüzülmigen. Eger uni hésablighanda, omumiy sanning téximu kop bolushi mumkin iken.

Xewerde éytilishiche, neq puldin bashqa yene bir milyon 570 ming yüen qimmitide maddi buyumlarmu toplan'ghan bolup, nöwette, yardem neq pul we maddiy buyumliri dawamliq köpeymekte iken. Uyghur élidin tarqitilidighan tor betlerdiki uchurlardin qarighanda, hökümetning teshkillishi bilen qumul wilayitining melum yézisidiki déhqanlar 20 ming dane nan teyyarlap, sichü'en'ge ewetken.

Hetta 2003 - yili, 24 - martta qattiq yer tewresh yüz bérip, 270 din artuq adem ölgen, nurghun adem yarilan'ghan hem öy makansiz qalghan maralbéshi nahiyisining chongqurchaq yézisidiki, yilliq kirimi xitayning bashqa ölkilirige hetta sichü'en'ge sélishturghandimu köp töwen hésablinidighan déhqanlar kent partkom sékritari, yer tewreshte a'ilisidiki besh ademdin ayrilghan hemde xitay bash ministiri wénjyabawning ghemxorluqigha érishken dawut hashimning bashlamchiliqida pul toplashqa kiriship, qisqighina waqit ichide 100 ming yüen yighilghan.

Téxi apetning zerbisidin toluq qutulalmighan hem özini ongshap bolalmighan, xitay boyiche eng kembeghel ademler hésablinidighan chongqurchaqliqlar sichüendiki apetke uchrighan xelqlerge insanperwerlik yardimini sun'ghan. Emma, bu xil i'ane toplashning nahiye - yéza aktip kadirliri teripidin melum derijide mejburiy tüs alduruliwatqanliqi heqqidimu inkaslar peyda bolmaqta.