ئۇيغۇر تىجارەتچىلەر ھەر خىل ھەقسىزلىقلارغا دۇچ كەلمەكتە

 ئىستانسىمىزغا بۇ ھەقتە گۇاڭدۇڭدىن بىۋاستە ئۇچۇر بەرگەن بىر ئۇيغۇر، ۋەقەنىڭ خوتەننىڭ كېرىيە ناھىيىسىدە خىتاي تىجارەتچىلەرگە، 200 مىڭ يۈەنلىك "توشقان زەدىكى" سېتىپ، ئۇنىڭ پۇلىنى ئالالمىغانلىقى سەۋەبلىك مەيدانغا كەلگەنلىكىنى بىلدۈرۈپ، 50 كە يېقىن ئۇيغۇرنىڭ كېرىيىدىن گۇاڭجۇغا يېتىپ كەلگەنلىكىنى، بىراق ئۇلارنىڭ ۋەقە ئۈستىدە سۈرۈشتۈرۈش ئېلىپ بېرىش ئىلتىماسىنىڭ ھازىرچە نەتىجىسىز خۇلاسىلانغانلىقىنى ئاشكارىلىدى.

مۇخبىرىمىزنىڭ ئىچكىرىلەپ ئىگىلىگەن مەلۇماتىدىن قارىغاندا، گۇاڭدۇڭدىكى مۇناسىۋەتلىك ئورۇنلار، كېرىيىدىن كەلگەن ئاساسلىقى ياشانغان كىشىلەردىن تەركىپ تاپقان ئەرىزدارلارنىڭ داۋاسىنى 6 ‏ئاي ئىچىدە بىر تەرەپ قىلىپ بېرىشكە ۋەدە قىلىپ، ئۇلارنى يولغا سېلىپ قويغان.

خىتاينىڭ ئۆلكىلىرىدە تىجارەت قىلىۋاتقان ئۇيغۇر تىجارەتچىلەر بولسۇن ۋە ياكى ئۇيغۇر ئېلىدا خىتاي تىجارەتچىلەرگە مال ساتقان ئۇيغۇرلار بولسۇن، ھەر خىل ھەقسىزلىكلەرگە دۇچ كېلىۋاتقانلىقى مەلۇم بولماقتا. 3 ‏ - ئاينىڭ باشلىرى خوتەنلىك قاش تېشى تىجارەتچىسى مۇتەللىپ ھاجىم، ساقچىلار تەرىپىدىن ئۇرۇپ ئۆلتۈرۈلگەن گۇناھسىز ئۇيغۇر تىجارەتچىلەردىن بىرى ھېسابلىنىدۇ.