لوندوندىكى ئۇيغۇر ئانسامبىلى ئىرلاندىيىدە ئويۇن قويدى

12-ئۆكتەبىر كۈنى لوندوندىكى ئۇيغۇر ئانسامبىلى ئىرلاندىيە جۇمھۇرىيىتىنىڭ دۇبلىن مۇزىكا ئىنستىتۇتىنىڭ كۇتۇپخانىسىدا ئۇيغۇر ناخشا مۇزىكىلىرىنى ئورۇنداپ، ئۇيغۇر سەنئىتىنى نامايەن قىلدى.

ئۇلارنى مەزكۇر مۇزىكا ئىنىستىتۇتى رەسمىي تەكلىپ قىلغان ئىدى. لوندون ئۇيغۇر ئانسامبىلىنىڭ بۇ قېتىمقى پائالىيىتى مەزكۇر ئىنستىتۇت تەرىپىدىن ئۇيۇشتۇرۇلغان خىتاي ۋە شەرقىي ئاسىيا مۇزىكا مەدەنىيەت مۇھاكىمە يىغىنىغا مۇناسىۋەتلىك بولۇپ، مۇھاكىمە يىغىنىدا خىتاي ئەنئەنىۋى مۇزىكىلىرى، شەرقىي ئاسىيا مۇزىكىلىرى جۈملىدىن ئۇيغۇر ، موڭغۇل قاتارلىق مىللەتلەرنىڭ ئەنئەنىۋى مۇزىكا مەدەنىيەت مەسىلىلىرى ھەققىدە مۇھاكىمىلەر ئېلىپ بېرىلغان ، ئىگىلىشىمىزچە، ئاساسلىق مۇھاكىمە تېمىسى يەنىلا خىتاي ئەنئەنىۋى مۇزىكىلىرىغا بېغىشلانغان.

مۇھاكىمە يىغىدىن كېيىن ، لوندون ئۇيغۇر ئانسامبىلى، موڭغۇل مىللىتىدىن بولغان ناخشىچى ۋە باشقىلار ئۆز سەنئەت نومۇرلىرىنى كۆرسەتكەن.

بۇ ئۆمەك 2004-يىلى قۇرۇلغان. مەزكۇر ئانسامبىل لوندوندا ياشايدىغان بىر قانچە نەپەر ئۇيغۇر ناخشا-مۇزىكا ھەۋەسكارى ۋە ئۇيغۇرلارنىڭ مۇزىكىلىرىغا ئىشتىياق باغلىغان ئىنگلىزلاردىن تەركىپ تاپقان. بۇ ئۆمەك ئادەم كۈچىنىڭ ئاز ، قۇرۇلغان ۋاقتىنىڭ قىسقا بولۇشىغا قارىماي، 2005-يىللىق لوندون مۇساپىرلار بايرىمىدا ۋە 2007-يىلى، 6-ئايدا لوندوندا ئۆتكۈزۈلگەن مۇساپىرلار ھەپتىسىدە ، ئۇيغۇر مۇزىكىلىرىنى ئورۇندىغان.

لوندون ئۇيغۇر ئانسامبىلى ئاساسلىقى ئۇيغۇر خەلق ناخشىلىرى، مۇقاملىرى ۋە باشقىلارنى ئەنگىلىيە تاماشىبىنلىرىغا تونۇشتۇرۇشتا بەلگىلىك رول ئويناپ كەلمەكتە. (ئۈمىدۋار)