روېيتېرس : ئەنسىز شىنجاڭ، خىتاينىڭ تىبەتتىن كېيىنكى يېغىلىق ماكانى بولۇپ قالامدۇ؟

 ئەنسىز شىنجاڭ خىتاينىڭ تىبەتتىن كېيىنكى يېغىلىق ماكانى بولۇپ قالامدۇ، دېگەن ماۋزۇدىكى مەزكۇر خەۋەردە كىشىلىك ھوقۇقنى كۆزىتىش تەشكىلاتىنىڭ تەتقىقاتچىسى نوكولاس بېكيۇلىننىڭ سۆزىنى نەقىل كەلتۈرگەن. نىكولاس بېكيۇلىن "سىىياسەت ئۇيغۇرلار بىلەن باشقا مىللەتلەر ئارىسىدىكى پەرقنى چوڭايتماقتا.....كىشىلەر دۆلەتنىڭ كىملىك مودىلىغا قارشى ئۆز مۇداپىئە سېپىنى قۇرۇپ، مىللىي كىملىكىنى قوغدىماقتا "دەپ تەكىتلىگەن.

روېيتېرس ئاخبارات ئاگېنتلىقى مۇخبىرى لىندسېي بېكنىڭ مەزكۇر خەۋىرىدە يەنە، ئۇيغۇر ئېلىدە خىتايغا قارشى نارازىلىق ھەرىكەتلىرىنىڭ تىبەتكە ئوخشاش كەڭ كۆلەملىك ۋە ئاممىۋى خاراكتېرلىك تۈس ئالالماسلىقىدىكى سەۋەبلەر ئۈستىدە توختىلىپ، بۇنىڭ تۈپكى سەۋەبلىرىنىڭ بىرى، خىتاي دائىرىلىرىنىڭ بۇ رايوندىكى خەلقلەرنى ناھايىتى قاتتىق كونترول قىلىدىغانلىقى، يەرلىكلەرگە بۇنداق بىر ئىمكانىيەت بەرمەيدىغانلىقىدىن ئىكەنلىكىنى بىلدۈردى.

خەۋەردە خوتەن ۋىلايىتىدە يېقىندا يۈز بەرگەن ئاياللار نامايىشى ئالاھىدە تىلغا ئېلىندى، لېكىن نامايىشنىڭ خىتاي رەھبەرلىرى ئەنسىرىگەندەك تىبەتكە ئوخشاش ئومۇميۈزلۈك تۈس ئالالماي، شۇ جاينىڭ ئۆزى بىلەن چەكلىنىپ قالغانلىقىنى يازدى. خەۋەردە يەنە، بىر يەرلىك ئۇيغۇر قىزنىڭ سۆزىنى نەقىل كەلتۈرۈپ مۇنداق دەيدۇ،" سىز بۇ يەردە كىشىلەرنىڭ كىچىككىنە ئىشلار ئۈچۈنمۇ قولغا ئېلىنغانلىقىنى ئاڭلايسىز......شۇڭا بۇ يەردە چوڭ كۆلەملىك ۋەقەلەرنىڭ يۈز بەرمىكى تەس."