"Shingdaw" géziti: ürümchide xitay qoralliq küchliri bilen Uyghurlar arisida qoralliq toqunush yüz bergen


2008.02.15

Xongkongda chiqidighan " yultuzluq aral" gézitining xewer qilishiche, yéqinda Uyghur aptonom rayonining merkizi ürümchide xitay qoralliq qisimliri bilen Uyghur qarshiliq körsitish küchliri arisida qoralliq toqunush yüz bérip, az dégende 18 Uyghur öltürülgen. Xitay tereptin 2 saqchining ölgenliki ilgiri sürülmekte.

"Yultuzluq aral" ning xewirige qarighanda, da'iriler 13 ‏- féwral küni ürümchide qoralliq toqunush yüz bergenlikini étirap qilghan bolsimu, lékin toqunushta saqchilarning ölgenlikini inkar qilghan. Xewerde weqening 4 ‏- féwral küni ürümchining bext baghchisi ahalilar rayonida yüz bergenlikini, bext yoli saqchi ponkitidiki xadimlarning heriketke qatnashqanliqini ilgiri sürdi. Lékin da'iriler hazirgha qeder mezkur weqe toghrisida resmiy bayanat élan qilip baqmidi.

Bext yoli saqchi ponkitidikiler weqe yüz bergen waqit chaghan mezgili bolghanliqtin kishilerni chöchütiwetmeslik üchün weqeni élan qilmighan. Bext yoli saqchi ponkitidiki xadimlar muxbirimizning bu heqtiki su'allirigha jawap bérishni ret qilghan bolsimu, lékin qoralliq toqunush yüz bergenlikini inkar qilmidi. Bext yoli saqchi ponkitidiki bir xadim, "bu weqe toghrisida bayanat bérish salahiyiti yoqluqini", eskertti.

Lékin bext baghchisida olturidighan bir xitay puqrasi xongkongdiki muxbirimizgha saqchilar bilen Uyghurlar arisidiki toqunush özi olturidighan binaning arqisida yüz bérip, adem ölgenlikini, lékin ölgenlerning hemmisi Uyghurlar ikenlikini bildürdi. U, saqchilardin adem ölmidi" deydu. Yene bezi xewerlerde weqening shu jaydiki baghchida yüz bergenlikini, saqchilarning baghchigha toplan'ghan Uyghurlargha oq chiqarghanliqini bildürmekte. Weqe chaghan küni yüz bergen bolsimu, lékin da'iriler bu weqeni élan qilmighan hem bext yoli saqchi ponkitining bashliqini derhal wezipisidin élip tashlighan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.