Нюйорк шәһиридики хитайда кишилик һоқуқ тәшкилати уйғур язғучиси нурмуһәммәтниң тәқдирини сүрүштүрди


2007-08-27
Share

Мәркизи америкиниң нюйорк шәһиридики хитайда кишилик һоқуқ тәшкилати 24‏- авғуст күни бир баянат елан қилип, хитай һөкүмитидин түрмидики уйғур язғучиси нурмуһәммәт ясинниң саламәтлики һәққидә хәлқара җамаәткә мәлумат беришини тәләп қилди.

Баянатида нурмуһәммәт ясинниң түрмидә қейин-қистақ астида өлгәнлики һәққидә, ениқланмиған хәвәрләр оттуриға чиққанлиқини әскәрткән хитайда кишилик һоқуқ тәшкилати, бейҗиңда турушлуқ чәт дөләт баш әлчиханилирини һәмдә б д т ниң қейин-қистаққа қарши туруш комитетиниң рәисини хитай һөкүмити билән көрүшүп нурмуһәммәт ясин мәсилисини оттуриға қоюшқа шундақла нурмуһәммәт ясинниң саламәтликини ениқлаш үчүн, хитай һөкүмитидин уни түрмидә зиярәт қилишни тәләп қилишқа чақирди.

Уйғур шаир вә язғучиси нурмуһәммәт ясин 2004 ‏- йили ноябир ейида қәшқәр әдәбияти журнилида " ява кәптәр" намлиқ қисқа бир һекайә елан қилғанлиқи үчүн шу йили 29 ‏- ноябир күни хитай һөкүмити тәрипидин аталмиш " дөләтни парчилашқа қутратқан" дегән җинайәт билән әйиблинип қолға елинған.

Қәшқәр оттура сот мәһкимиси 2005‏- йили феврал ейида нур муһәммәт ясин үстидин йепиқ сот ичип уни 10 йиллиқ қамақ җазасиға һөкүм қилған . Хитай һөкүмитиниң нурмуһәммәт ясинни 10 йиллиқ қамақ җазасиға һөкүм қилғанлиқи хәлқара җамаәтниң қаттиқ наразилиқини қозғиған иди.

Йеқинқи күнләрдә, нурмуһәммәт ясинниң түрмидә хитай сақчилири тәрипидин уруп өлтүрүлгәнлики һәққидә хәвәрләр тарқалған болсиму, лекин һазирғичә бу хәвәрләрниң раст яки ялғанлиқи ениқланмиған. (Өмәр қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт